Primeiru-Ministru, Taur Matan Ruak. Imajen GPM

LIQUIÇÁ, 1 jullu 2019 (TATOLI)—Primeiru-Ministru (PM), Taur Matan Ruak, hato’o omenájen ba saudozu Jaime Ribeiro alias Samba 9, iha Suku Ulmera, Postu Administrativu Bazartete, Munisípiu Liquiçá.

Marka prezensa iha saudozu ninia rezidénsia, ohin, Xefe Governu ne’e hetan akompaña hosi ninia espoza, Isabel da Costa Ferreira no mós akompaña hosi ekipa Gabinete Primeiru-Ministru. Xefe Governu hatudu sentidu kondolénsia ho laran triste bainhira haree ninia eis eskoltu ne’e laiha ona iis.

Hafoin ne’e, Primeiru-Ministru ho espoza no ekipa Gabinete Primeiru-Ministru hakat ba komprimenta saudozu ninia família no oan ki’ak sira.

Reprezentante Komisaun Omenájen, César dos Santos alias Merak, informa oras ne’e família matebian ho estadu koordena malu katak sei haloot saudozu ha Jardim dos Herois Metinaro, iha kinta (5/7/2019).

“Ami sente triste tanba luta tinan 24 to’o funu ramata, ema ne’ebé nasionalista duni ba rai ida ne’e lakon ida-ida. Nia (saudozu Samba) ema ne’ebé pasiénsia, dedikadu ba prosesu funu no barani tebes. Iha aspeitu balun, nia rasik mak tenke domina nia aan, ema seluk labele. Kuandu buat ruma, nia sempre hatudu reasaun, maibé komandante sira seluk kompriende nia situasaun iha tempu ne’ebá,” Merak haktuir.

Veteranu ne’e informa, fou-foun, saudozu Samba 9 la’ós komandante, maibé hanesan milísia FALINTIL. Nia (Samba) hetan kargu Komandante Seksaun iha tinan 1982 hafoin rezultadu konferénsia iha 1981. Hafoin ne’e, sa’e ba Segundu Komandante Rejiaun no Kolaboradór Rejiaun IV nian.

“Ami koordena ona estrutura 13 de Setembro Liquiçá ho mós Konsellu Juventude no autoridade Liquiçá, katak sei mobiliza malu hodi lori saudozu ba haloot iha Jardim dos Herois Metinaro,” dehan Merak.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here