Diretór Komisaun Justisa no Pás, Dioseze Dili, Pe. Hermínio Gonçalves. Imajen/Cipriano Colo

DILI, 01 jullu 2019 (TATOLI)– Igreja Katólika kontra pena de morte (hukuman mati) ne’ebé nasaun lubuk ida iha mundu adopta, inklui mós Repúblika Indonézia. Tanba ne’e, Diretór Komisaun Justisa no Pás, Dioseze Dili, Padre Hermínio Gonçalves, husu ba governu Timor-Leste (TL) atu halo komunikasaun pro-ativa para bele  salva kazál Timoroan ne’ebé sai vítima ba droga no oras ne’e iha prosesu atu submete ba pena de morte tuir lei Indonézia nian.

Timor oan na’in rua (kazál) ne’e transporta droga ho tipu éstaze (x-tasy)  ba Indonézia no hetan apreensaun (foti) husi Alfándega Indonézia, iha fronteira Mota-ain Batugade, ho totál pílula (pil) 4874 subar iha iha mákina impresora tipu EPSON A4.

Kazál timoroan ne’e halo viajen baibain ho travel, ba fronteira ho destinasaun ba Kupan-Indonézia. Sira na’in rua liu-husi kontrolu Alfándega Mota-ain Timor Leste ho scan maibé la deteta no ikus Alfándega Indonézia prende sira na’in rua.

Amu Hermínio husu intervensaun estadu tanba tuir prosesu ne’ebé nia akompaña katak, sidadaun na’in rua (kazál) ne’e la’ós autór, maibé vítima ba ema seluk nia lasu.

Amu Hermínio esplika, Servisu Migrasaun Atambua detein kazál timoroan ne’e tanba hetan droga ne’ebé falun iha mákina impresora nia laran, no mákina ne’e rasik la’ós sira na’in rua nian, maibé ema seluk nian.

“Ida ne’e konsidera hanesan vítima la’ós autór, tanba ne’e, bainhira governu intervein iha prosesu investigasaun ne’e sei bele salva sidadaun na’in rua ne’e,” hateten Amu Hermínio hodi responde Ajénsia TATOLI, ohin, iha nia servisu fatin, Dili.

Bibi atan ne’e husu governu TL atu buka defensór hodi salva sidadaun na’in rua ne’e, nune’e labele husik sira submete ba pena de morte.

‘‘Ita nia estadu tenke halo netik buat ruma no labele husik de’it hanesan ne’e, bainhira ema nia lei dehan labele ona, foin ita rende,” hateten Padre Hermínio.

Nia fundamenta, Igreja Katólika nia pozisaun kontra pena de morte, tanba ema nia mate ne’e úniku Maromak mak fó, la’ós ema mak determina. Tanba ne’e maka Timor Leste la adopta pena ida ne’e iha konstituisaun Repúblika Demokrátika de Timor Leste.

Kona-bá Repúblika Indonézia adopta pena de morte, Padre Hermínio, konsidera hanesan krime ida ne’ebé hetan legalizasaun husi lei Indonézia rasik.

 Lee Mós Notísia Tuir Mai:http://www.tatoli.tl/2019/06/autoridade-indon…a-kazal-timoroan/

http://www.tatoli.tl/2019/06/mnek-buka-hela-a…an-iha-indonezia/

 http://www.tatoli.tl/2019/06/ptr-husu-governu…a-kazal-timoroan/ ‎

 http://www.tatoli.tl/2019/06/pm-taur-ho-pr-lu…oroan-lori-droga/

Jornalista             : Cipriano Colo

 Editór                    : Francisco Simões

HAKEREK NO HATÁN

Please enter your comment!
Please enter your name here