Saudozu Jaime Ribeiro "Samba Sembilan". Imajen/Mídia PR

DILI, 1 jullu 2019 (TATOLI)—Ha’u-nia naran kódigu ne’e SAMBA. Buat SEMBILAN ne’e hanesan vila nian. Agora SAMBA ne’e buat múzika. Múzika Samba mak tau fali Sembilan. Ó dansa Samba ne’e, ó tenke ba vila. Ninia konteúdu mak ne’e de’it. Ba tan ne’e, laiha ona!

Iha odamatan boot fulan jullu nia oin, iha eskada dahuluk nian (01 jullu 2019), odamatan mate-nian nakloke luan ba veteranu Samba-Sembilan hodi sama ain iha eskada ida ba ida, sa’e eskada lalehan nian ba hasoru Maromak iha leten no aas. Santu sira be tuur iha odamatan lalehan nian, tanis halerik. Anju sira hananu aiknananuk “requiem eterna”. Balada sira, rai-lulik Timor-Leste mós tanis hosi ninin ba ninin. Timoroan sira mós tanis, hosi fuan ba fuan.

Ema hotu, timoroan sira hotu, veteranu sira hotu, hotu-hotu fó omenájen ikus ba saudozu Samba-Sembilan. Ba ita sira ne’e hotu, wainhira Samba-Sebilan simu kondekorasaun Kolár  Órden Timor-Leste hosi Prezidente Republika, Francisco “Lú Olo” Guterres, iha 28 novembru 2018, veteranu Samba-Sembilan husik hela lia tatoli;

“Ita-boot sira hanesan ulun tuur iha oin, ami hanesan iha foho halo to’os ho natar hanesan fó hanoin de’it. Maibé, ita-boot sira mak tuur iha ne’ebá, haree malu di’ak. Labele ódiu no labele vingansa. Politika la’ós ódiu vingansa. Ha’u-nia naran kódigu ne’e Samba. Buat SEMBILAN ne’e hanesan vida nian. Agora SAMBA ne’e buat múzika Samba mak tau fali Sembilan. Ó dansa Samba ne’e ó tenke ba vila. Ninia konteúdu mak ne’e de’it. Ba tan ne’e, laiha.”

Hanesan múzika, Samba-Sembilan nia naran ema temi rohan laek. Hanesan múzika, Saba-Sembilan nia naran nakonu ho mistériu ne’ebé hosi jerasaun ida ba jerasaun ida seluk, temi nafatin. Hanesan múzika, Samba-Sembilan nia naran sai hanesan múzika ida ne’ebé ninia rítmu no melódia hanesan wee-matan be susar atu maran.

Hanesan wee, Samba-Sembilan nia naran idéntiku ho funu no tiru-malu ho inimigu sira. Katak, naran “Samba” ne’e tanba nia tiru inimigu ho kilat-musan ida bele tiru-borus ema na’in sia (9) mate iha iha biban hanesan.

“Ami halo embuskada ida, kilat musan ida kona ema na’in-sia (9). Ne’e tebes! Realidade. Tanba primeiru nia komandante pelotaun, ha’u mós komandante pelotaun,” haktuir Komandante Lourenço José Cabral alias Aquito. Maibé, iha loron 30 juñu 2019, múzika “Samba-Sembilan” nia rítmu no melódia, ramata iha moris ida-nia moris (mate).

Komandu Luta, Kay Rala Xanana hato’o sentidu kondolénsia ba saudozu Jaime Ribeiro ‘Samba-Sembilan’ liuhusi hakerek liafuan; “Ami sei hamutuk ho ó-nia família”.

Primeiru-Ministru, Taur Matan Ruak, mós hato’o sentidu kondolénsia ba família enlutadu. “Ha’u-nia sentidu kondolénsia ne’ebé kle’an ba família saudozu nian ne’ebé triste hela tanba lakon ita-nia aswa’in ida ne’ebé iha tempu okupasaun barani tebes kaer kilat hodi reziste hasoru invazór sira, hodi ohin ita iha nasaun ida livre no independente. Ita hotu reza ba Nai Maromak atu simu nia iha Nai Nia Reinu no husu atu nia klamar kontinua tau-matan ba nia família no ita hotu hodi kontinua obra sira ne’ebé nia husik hela iha mundu,” katak Taur.

“Nia mate nu’udar lakon ida ba estadu ne’ebé iha tempu okupasaun fó vida tomak ba nasaun, tanba ne’e estadu sei la haluha iha povu Timor-Leste nia fuan. Deskansa ho hakmatek iha Nai nia Kadunan Santu. Adeus!”

Hanesan múzika, Saudozu Samba-Sembilan nia naran labele haketak hosi Komandu ba Luta Kay Rala Xanana Gusmão no Jenerál Taur Matan Ruak. Hanesan múzika, Samba-Sembilan mak sai eskoltu ba luta-na’in—na’in rua ne’e iha iha ailaran.

“Hanesan buat ida, maun Xanana ho maun Ruak, ami na’in-rua ne’e permanente ba sira na’in-rua. Komandante Rai Ria mak entrega ba ami na’in-rua. La oras de’it, ami tenke sai no asegura sira na’in-rua,” Komandante Lourenço José Cabral alias Aquito, haktuir istória ne’e ba Agência TATOLI iha Ulmera, segunda (1/7/2019). “Dezde tinan 1986 no 1987 ne’e, ha’u ho Samba-Sebilan hahú sai eskolta ba Kay Rala Xanana Gusmão ho Taur Matan Ruak.”

Ami na’in-rua troka malu. Wainhira Samba-Sebilan ba lidera forsa, ha’u mak asegura maun Xanana. Se ha’u mak lidera forsa, Samba-Sembilan mak asegura Xanana. Bainhira problema mosu iha rejiaun hotu-hotu, maun Xanana buka ami na’in-rua mai hamutuk ho nia hodi rezolve sira-nia problema. Asaun ne’ebé de’it, ami sempre hamutuk ho maun Xanana.

Komandante Aquito hasoru saudozu Samba-sembilan iha tinan 1984 iha Rejiaun III kompostu hosi Manatuto, Manufahi no Aileu. Momentu ne’ebá, sira na’in-rua seidauk toman malu. Liu semana ida toman malu hanesan inan ida no aman ida nia oan.

“Bainhira maun Xanana kaptura, ami na’in-rua ko’alia nune’e. Xanana kaptura, ne’e katak Xanana 10 sei mosu fali. Tanba ami hatene. Iha tinan 1997 komandu transfere Samba 9 ba Rejiaun IV, ami na’in rua fahe malu. Ha’u dehan ba nia, ne’e kompromisu ita na’in-rua nian labele fahe malu iha kualkér tempu. Maibé organizasaun maka obriga ita na’in-rua tenke fahe malu. Ha’u hameno ba nia, ba kuidadu no la’o ho Maromak, kontrola soldadu hanesan baibain ita na’in-rua kuidadu, labele dezkontroladu. Nia hateten ba ha’u, asegura xefe estadu maiór. Ida ne’e mak komandu funu, laiha tan seluk atu komanda funu,” haktuir Komandante Aquito ho tanis.

“Ha’u hateten hanesan ne’e ba nia feen ho nia oan. Bainhira ha’u sei moris, nia oan hanesan ha’u-nia oan. Ha’u sei ko’alia ho estadu. Bainhira nia atu tau ba kaixaun, família sira tenke husu ha’u. Tanba ami na’in-rua nia kompromisu iha ai-laran todan tebes. Bainhira ha’u  sei moris, ha’u sei haree nia oan na’in-ualu ne’e,” nia dehan.

Ami na’in-rua salva maun Xanana iha rai Sarlolo iha Ainaro. Ami na’in-rua mak troka malu salva maun Xanana. Ami-nia karáter iha prosesu funu, ohin ida, aban ida, bainrua ida. Karáter iha funu la permanente.

Hakoi iha Jardim dos Herois da Pátria Matinaro

Xefe Estadu, Francisco Guterres “Lu-Olo, liuhusi Dekretu Prezidente  Republika Nú. 28/2019, rekoñese no valoriza  kontribuisaun Jaime Ribeiro “Samba-Sembilan” iha prosesu  luta libertasaun nasionál ho direitu atu hetan onra fúnebre  no hakoi iha Jardim dos Herois da Pátria iha Metinaro, iha sesta (5 jullu 2019).

Biográfia

Saudozu Jaime Ribeiro alias Samba-Sembilan moris iha loron 15 fulan abríl 1959, iha Suku Ulmera, Postu Administrativu Bazartete, Munisípiu Liquiçá. Saudozu nia aman naran Aniceto Ribeiro no inan naran Aurélia Pereira (matebian hotu ona) hosi Liquiçá. Saudozu Samba-Sembilan iha maun-alin na’in haat (4).

Samba-Sembilan nia espoza dahuluk naran Albertina Noronha husik hela oan ida no espoza daruak Manuela Pereira Ribeiro nia oan hamutuk na’in hitu (7). Samba-Sembilan partisipa iha luta libertasaun nasionál durante tinan 24 nia laran, hahu hosi FALINTIL harii iha loron 20 agustu 1975 to’o Timor-Leste hadau ninia independénsia. Adeus Samba! Ami Sei Hamutuk ho Ó-Nia Família.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here