Saudozu Samba Sembilan, altura sei foinsa’e nu’udar forsa FALINTIL iha ai-laran. Imajen/Espesiál

LIQUIÇÁ, 1 jullu 2019 (TATOLI) — Komandante Lourenço José Cabral alias Aquito, konta saudozu Jaime Ribeiro nia luta iha prosesu funu ba libertasaun nasionál. Komandante Aquito hasoru saudozu Samba 9 iha tinan 1984 iha rejiaun III kompostu hosi Manatuto, Manufahi no Aileu.

Momentu ne’ebá, nia haktuir, sira na’in-rua seidauk toman malu, maibé liu de’it semana ida toman malu hanesan inan-ida no aman-ida nia oan.

“Ami halo embuskada ida kilat musan ida kona ema na’in-9. Ne’e tebes. Realidade. Tanba primeiru nia komandante pelotaun, ha’u mós komandante pelotaun,’’ Aquito haktuir.

Iha momentu ne’ebá, nia lebra, iha Sentru Leste, kompañia Rejiaun Kruzeiru perkore Munisípiu Manatuto, Same ho Aileu (Rejiaun III). Tanba ne’e, saudozu sa’e ba komandante sub-rejiaun, nia sa’e ba segundu komandante iha tinan 1988 no 1989 iha área Soibada, Fatuberliu no Alas.

Veteranu na’in-rua fou-foun ataka militár 744 no 745 no Batallaun 705 bainhira Samba 9 lidera Rejiaun IV asumi kargu rua, ida segundu komandante rejiaun iha 1989 no kolaboradór Xefe Estadu Maiór iha 1998.

“Bainhira maun Xanana kaptura, ami na’in-rua ko’alia nune’e, Xanana kaptura, ne’e katak Xanana 10 sei mosu fali, tanba ami hatene,” veteranu ne’e informa.

Iha tinan 1986 no 1987 ne’e, komandante Aquito ho Samba 9 hahú eskolta ba Kay Rala Xanana Gusmão ho Taur Matan Ruak.

Iha tinan 1997, komandu tranfere Samba 9 ba Rejiaun IV, iha ne’ebá sira na’in-rua fahe malu. “Molok ami na’in-rua fahe malu, ha’u sei hateten ba nia hanesan ne’e, kompromisu ita na’in-rua nian labele fahe malu iha kualkér tempu, maibé organizasaun maka obriga ita na’in-rua tenke fahe malu,” tenik Aquito.

“Ha’u hameno ba nia dehan hanesan ne’e, ba kuidadu no ba ho Maromak. Kontrola soldadu hanesan bainbain ita na’in-rua kuidadu. Labele dezkontroladu tanba bainhira hanoin barak ita bele dezkontroladu no ita bele hasoru problema, tanba ne’e funu laran,” nia salienta.

Samba 9 rekomenda ba Aquito hanesan ne’e, asegura Xefe Estadu Maiór, tanba ida ne’e mak komanda funu, laiha tan seluk atu komanda funu.

“Bainhira ami na’in-rua hamutuk foti kilat rua iha Betano, segundu ami foti kilat tolu iha Alas, terseiru ami foti tan kilat tolu iha rai ida naran Kaikasa (Fatuberliu). Tuir mai ami foti tan kilat ida iha rai ida naran Sari (Fatuberliu) no ami halo operasaun konjunta ida foti kilat iha Barique ho Kribas nia klaran hamutuk kilat 13. Ami foti kilat tolu iha rai ida naran Kaoris (Alas), nia la’o mesak foti tan kilat ida iha Lequidoe no ha’u ba súl foti kilat tolu,” ’haktuir Komandante Aquito ho tanis.

Asaun ne’ebé Komandante Aquito ho Samba 9 halo koordenadu. “Hanesan buat ida, maun Xanana ho maun Ruak, ami na’in-rua ne’e permanente ba sira na’in-rua. Komandante Rai Ria mak entrega ba ami na’in-rua. La oras de’it ami tenke sai no asegura sira na’in-rua,” nia dehan.

“Bainhira problema mosu iha rejiau hotu-hotu, maun Xanana buka ami na’in-rua mai hamutuk ho nia hodi rezolve sira-nia problema. Asaun ne’ebé de’t ami sempre hamutuk ho maun Xanana,” Aquito dehan.

Nia hateten ba saudozu nia família nune’e: “Bainhira ha’u sei moris, saudozu nia oan hanesan ha’u-nia oan. Ha’u sei ko’alia ho estadu, bainhira atu tau nia ba kaixaun, família sira tenke husu ha’u tanba ami na’in-rua nia kompromisu iha ai-laran todan tebes. Bainhira ha’u sei moris, ha’u sei haree nia oan na’in-ualu ne’e”.

Jornalista: Evaristo Soares

Editór: Xisto Freitas

HAKEREK NO HATÁN

Please enter your comment!
Please enter your name here