DILI, 01 jullu 2019 (TATOLI)—Organizasaun Juventude FRETILIN lamenta Oitavu Governu konstitusionál  nomea eis Ministru Turizmu, Francisco Kalbuadi LaY sai  Prezidente Autoridade Nasionál Expo 2020 iha Dubai.

Liuhusi konferénsia imprensa ne’ebé hala’o iha Sede Komité Sentrál FRETILIN  (CCF-sigla portugés) iha Fatuhada, Comoro, ohin, Portavóz Juventude FRETILIN, Antoninho José de Deus, deklara nomeasaun Francisco Kalbuady Lay ne’e hamonu  integridade Estadu  no laiha vontade atu kombate korrupsaun iha Timor-Leste.

“Deklarasaun deputadu sira ne’e  la kebra prinsípiu prezunsaun inosénsia tanba dadaun ne’e Kalbuady Lay iha hela alegasaun brankeamentu kapitál no hetan medida kausaun hosi Ministériu Públiku,” afirma Antoninho.

Tuir nia, nomeasaun ne’e  inkompatível tanba kalbuady Lay  asumi nu’udar deputadu iha Parlamentu Nasionál ho kna’ar hanesan fiskalizadór no lejizladór, la’ós serbisu  hanesan órgaun ezekutivu.

Tanba ne’e, nia dehan, Juventude FRETILIN hakarak alerta ba juventude tomak mai hamutuk hodi kombate inimigu komun foun maka prátika korrupsaun, koluzasaun no nepotizmu iha istituisaun Estadu Timor-Leste no alerta ne’e mós ho objetivu atu kontribui ba governasaun ida moos no di’ak hodi responde de’it ba nesesidade ema hotu ni’an, la’ós ba grupu ka ema ida-rua nia interese.

“Problema sósiu-ekonómiku ne’ebé ita-nia rai hasoru ohin loron mai hosi kauza ida mak Korrupsaun, Kolusaun no Nepotizmu (KKN). Tanba ne’e, hanesan joven futuru rai ida ne’e, tenke tau korrupsaun hanesan inimigu foun ida iha luta ba libertasaun povu,” deklara portavóz ne’e.

Molok ne’e,  Organizasaun Juventude Partidu Kongresu Nasionál Rekonstrusaun Timorense (OJP-CNRT, Sigla portugés), hato’o agradesimentu ba VIII Governu Konstitusionál ne’ebé nomea Fracisco Kalbuadi ba Expo Dubai tanba iha kapasidade no esperiénsia lidera Expo Milan-Italia iha tinan 2015 ho di’ak no susesu.

Jornalista : Florensio Miranda Ximenes

Editór: Xisto Freitas

Lee mós notísia tuir mai: http://www.tatoli.tl/2019/06/nomea-ba-autoridade-espozisaun-dubai-francisco-kalbuadi-agradese-konfiansa-governu/

 http://www.tatoli.tl/2019/06/la-subar-iha-imunidade-ojp-cnrt-konsidera-francisco-kalbuadi-hatudu-ezemplu-diak/

HAKEREK NO HATÁN

Please enter your comment!
Please enter your name here