Kay Rala Xanana Gusmão. Foto António Goncalves

LIQUIÇÁ, 1 jullu 2019 (TATOLI)—Eis líder rezisténsia, Kay Rala Xanana, hato’o sentidu kondolénsia kle’an ba família saudozu Jaime Ribeiro ‘Samba 9’ liuhosi liafuan ‘Ami sei hamutuk ho o-nia família”.

Sentimentu kondolénsia kle’an ne’e la’ós diretamente hato’o hosi Xanana Gusmão maibé liuhusi ninia oan mane, Kay Olok Sword Gusmão, ne’ebé ohin vizita saudozu Samba 9 nia mate-isin iha Suku Ulmera, Postu Bazartete, Munisípiu Liquiçá.

Prezensa Kay Olok Sword Gusmão iha Liquiçá, hetan akompaña hosi Korpu Seguransa Pesoál (CSP-sigla portugés) ne’ebé lor-loron asegura Kay Rala Xanana Gusmão.

Tuir informasaun ne’ebé Agência TATOLI rekolla hosi eskoltu Xanana nian katak, oras ne’e Xanana sei iha Bali. Tuir planu, Xanana Gusmão sei to’o iha Dili aban no sei presta omenájen ba saudozu Samba 9 iha Ulmera.

Iha tinan 1986 no 1987, komandante Lourenço José Cabral alias Aquito ho saudozu Jaime Ribeiro alias Samba 9 sai hanesan eskolta ba Komandante En-Xefe, Kay Rala Xanana Gusmão no Xefe Estadu Maiór, Taur Matan Ruak.

“Ami na’in-rua salva maun Xanana iha rai Sarlolo (Ainaro). Ami na’in-rua mak troka malu salva maun Xanana. Ami-nia karáter iha prosesu funu, ohin ida, aban ida, bainrua ida. Karáter iha funu la permanente,” Aquito ko’alia iha Ulmera, ohin,

Komandante Aquito ho saudozu Samba 9 sempre troka malu asegura Kay Rala Xanana Gusmão ho Taur Matan Ruak. “Kuandu nia (Samba 9) ba lidera forsa, ha’u mak asegura maun Xanana. Se ha’u mak lidera forsa, nia mak asegura Xanana”.

“Bainhira problema mosu iha rejiaun hotu-hotu, maun Xanana buka ami na’in-rua eskolta nia hodi mai rezolve sira-nia problema. Asaun ne’ebé de’it ami sempre hamutuk ho maun Xanana,” komandante Aquito haktuir.

Biográfia Saudozu Samba 9

Saudozu Jaime Ribeiro alias Samba 9 moris iha loron 15 abríl 1959, iha Suku Ulmera, Postu Administrativu  Bazartete, Munisípiu Liquiçá. Saudozu nia aman naran Aniceto Ribeiro no inan naran Aurélia Pereira (falesidu) hosi Liquiçá.

Saudozu Samba 9 iha maun-alin 4, mate na’in-rua iha funu, hela Samba ho maun-alin ida ne’ebé oras ne’e sei iha Indonézia. Espoza dahuluk naran Albertina Noronha ne’ebé horik hela oan ida no espoza daruak Manuela Pereira Ribeiro horik hela oan na’in 7 hamutuk oan hakiak hanesan oan mane boot. Tuir planu, sei haloot saudozu Samba 9 iha Jardim dos Herois Metinaro, 5 jullu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here