Prezidente Repúblika, Francisco Guterres Lú Olo. Imajen António Gonçalves

DILI, 1 jullu 2019 (TATOLI)—Xefe Estadu, Francisco Guterres Lú Olo, liuhusi Dekretu Prezidente Repúblika númeru 28/2019, rekoñese no valoriza kontribuisaun saudozu Jaime Ribeiro ‘Samba Sembilan (9)’ iha prosesu luta libertasaun nasionál ho direitu atu hetan onra fúnebre no hakoi iha Jardim dos Herois da Pátria iha Metinaro, iha 5 jullu 2019.

Tuir komunikadu ne’ebé Agência Tatoli asesu hosi Mídia Prezidénsia Repúblika, ohin, esplika katak artigu 11 Konstituisaun RDTL konsagra rekoñesimentu no valorizasaun rezisténsia ba Povu Maubere ne’ebé kontra okupasaun no ba ema ida-idak ne’ebé luta ba independénsia nasionál. Bazeia ba Lei Estatutu Kombatentes Libertasaun Nasionál fó omenájen ba Kombatente Libertasaun Nasionál.

Jaime Ribeiro ‘Samba Sembilan’ moris Liquiça, 15 abril 1959. Partisipa iha luta libertasaun nasionál durante tinan 24, dezde FALINTIL harii iha loron 20 agustu 1975, to’o Timor-Leste nia independénsia.

Jaime Ribeiro ‘Samba Sembilan’ hahú ho postu soldadu iha Frente Armada hosi 1975-1978 to’o zona libertada rahun. Hafoin Reorganizasaun Nasionál ba Rezisténsia iha tinan 1981, Samba asumi kargu nu’udar komandante sesaun to’o 1985. Hosi 1986-1991, sai komandante pelutaun. Hosi 1992-1999 asumi kargu nu’udar segundu komandante rejiaun.

Hafoin dezmobilizasaun, Jaime Ribeiro ‘Samba Sembilan’ fila ba vida sivíl, moris hanesan povu baibain to’o nia iis kotu.

Iha tinan 2007, Jaime Ribeiro ‘Samba Sembilan’ kondekoradu ho Ordem da Guerrilha. Iha 28 novembru 2018, Prezidente Repúblika Francisco Guterres Lú Olo kondekora Jaime Ribeiro ‘Samba Sembilan’ ho Kolár Ordem Timor-Leste.

Jaime Ribeiro ‘Samba Sembilan’ hakotu iis iha 30 juñu 2019, iha Hospital Nacional Guido Valadares, Dili.

Edisaun: Xisto Freitas

HAKEREK NO HATÁN

Please enter your comment!
Please enter your name here