SEPFOPE Haruka Tan Traballadór Timoroan 43 ba Servisu Iha Korea do Sul

0
147
Sekretáriu Estadu Formasaun Profisionál no Empregu (SEFOPE) Interinu no atuál Sekretáriu Estadu Protesaun Sivíl, Alexandrino Xavier Araújo, Segunda (24/6/2019), despedida traballadór timoroan na'in 43 ne'ebé atu ba servisu iha Korea do Sul. Imajen/SEFOPE

DILI, 24 Juñu 2019 (TATOLI)–Sekretáriu Estadu Formasaun Profisionál no Empregu (SEFOPE) Interinu no atuál Sekretáriu Estadu Protesaun Sivíl,  Alexandrino Xavier Araújo, ohin, despedida  tan traballadór timoroan na’in 43 ne’ebé sei dezloka ba servisu iha Korea do Sul.

Husi  traballadór na’in 43 ne’e, sei fahe ba area rua, kompostu husi na’in  22 ba servisu iha area peska no  servisu iha fabrika na’in 21.

Xefe Departamentu Empregu Exterior, Diresaun Nasional Empregu SEFOPE, Filomeno Soares informa, total traballadór timoroan  ne’ebé maka tama ona ba merkadu traballu Korea do Sul  nian hamutuk  na’in 3.348  no na’in 766 mak fila ona mai Timor-Leste.

“Ohin no aban sei haruka tan traballadór 43 ba iha merkadu traballu Korea do Sul,” informa Filomeno Soares perante ámbitu serimónia despedida ba traballadór na’in 43 iha Edifísiu SEFOPE, Dili.

Xefe Departamentu Empregu Exterior ne’e esplika,  kontratu  ne’ebé hala’o ba traballadór sira ne’ebé sei ba iha Korea do Sul maximum tinan tolu, maibé kuandu traballadór sira ho komportamentu di’ak sei halo extende sira nia kontratu tinan ida tan.

Filomeno Soares  klarifika katak, Governu liuhusi SEFOPE  haruka ona adidu balu ba iha  Korea atu evita mosu tan traballadór illegal atu nune’e bele asegura sira-nia vida moris iha Korea do Sul.

“Meius hotu-hotu ami halo para oinsá atu evita ida ne’e, liuhusi programa balu, ami bele servisu hamutuk ho Korean Human Resource Development ne’ebé eziste iha timor para atu bele haklaken informasaun ba sira, atu nune’e sira iha liu tan koñesimentu molok ba iha Korea,” hatete Filomeno Soares.

Xefe Departamentu ne’e informa, governu nia polítika la’ós haruka de’it, maibé governu mós iha polítika atu asegura sira bainhira fila mai Timor-Leste.

 Aleinde ne’e, governu nia polítika liuhusi SEFOPE mós sei servisu hamutuk ho Ministériu Agrikultura no Peska iha KOICA, hanesan meius ida para atu hasa’e tan sira nia koñesimentu iha area peska nian, atu nune’e governu bele suporta mós sira hodi aumenta tan sira nia koñesimentu bele transmite sira nia matenek hodi kontribui ba dezenvolvimentu ida ne’e.

Sekretáriu Estadu Formasaun Profisionál no Empregu Interinu atuál Sekretáriu Estadu Protesaun Sivíl , Alexandrino Xavier Araújo informa, hanesan interinu akompaña despedida ba traballadór  ne’ebé sei dezloka ba Korea do Sul tuir akordu ne’ebé Timor-Leste ho Korea do Sul asina.

“SEFOPE  iha funsaun no papél importante atu ezerse polítika Timor-Leste nian oinsá atu asina akordu ho nasaun seluk atu bele haruka ita nia joven sira ba servisu iha rai li’ur. Maibé saida maka SEFOPE halo atu bele alkansa ne’e maka  primeiru kona-ba empregu iha ita nia rai, segundu fila fali kona-ba atu ajuda ita nia joven sira atu aumenta tan kapasidade koñesimentu no esperiénsia ba servisu iha futuru,” hateten Alexandrino Xavier Araújo.

Nia husu ba traballadór timoroan na’in 43 ne’ebé atu ba servisu iha Korea do Sul tenke ho responsabilidade iha moral, katak, sai husi Timor-Leste despede inan-aman no mós nasaun atu ba servisu hodi hadi’a futuru no hadi’a nasaun.

Jornalista      : Nelia Rosario

Editór            : Francisco Simões

HUSIK IDA HATÁN