DILI, 07 juñu 2019 (TATOLI) –Delegasaun Ministru Transporte no Komunikasaun, José Agostinho da Silva, foin lais ne’e, halo vizita ba Portugal, la-haluha ministru ho ekipa vizita mós Ró Haksolok no hetan informasaun katak sei presiza tan kustu adisionál millaun $14 hodi finaliza prosesu konstrusaun ró ne’e rasik.
Hatán ba kestaun ne’e, Prezidente Autoridade Rejiaun Administrativa Espesiál Oe-cusse Ambeno (RAEOA) no Zona Espesiál Ekonomia Sosiál Merkadu (ZEESM), Marí Alkatiri rejeita informasaun ne’ebé dehan sei iha kustu adisionál ba Ró Haksolok.
“Informasaun ne’e la-loos, millaun $14 ne’e la’ós ba ró de’it maibé ba ró no mós ba ponte ne’ebé atu halo ida ba Oe-cusse no Atauro hanesan ponte kais para pasa revista. Ida ne’e de’it nia kustu millaun $100 ona, entaun informasaun la loos,” nia tenik ba jornalista sira iha Palásiu Governu, sesta ne’e.
Tuir Alkatiri, kustu millaun $14 hanesan kalkulasaun husi empreza ne’ebé halo Ró haksolok maibé seidauk iha kontratu adisionál ho Governu.
“Se kálkulu ne’ebé empreza aprezenta mai ho ninia lójika, to’o tempu kuandu sira rezolve ona sira-nia problema interna mak ita sei diskute fali adisionál ne’e hira no tanba sá? La’ós dehan iha ona kontratu para atu selu adisionál ka lae,” dehan Alkatiri.
Entretantu, konstrusaun fíziku Ró Haksolok atinje ona porsentu 70 no tuir kalkulasaun kompañia Eagle Ship katak fulan neen tan bele konklui ona, maibé presiza tan kustu adisionál millaun $14.
Durante vizita Ministru Transporte no Komunikasaun, José Agustinho da Silva ho Jestór no tékniku ne’ebé konstrui Ró Haksolok katak progresu konstrusaun ba Ró Haksolok la’o nafatin no garante katak, sedu ou tarde ró ne’e sei to’o mai Timor-Leste.
Ró Haksolok ho kustu millaun €13,7, inaugura iha loron 26 maiu 2017 iha sidade Figueira da Foz no tuir informasaun sei to’o Timor-Leste iha outubru 2017, maibé tanba problema internál husi kompañia ne’e rasik, to’o agora ró ne’e seidauk mai.
Ró ne’e rasik iha kapasidade atu tula ema na’in 377 no viatura karreta 15.
Jornalista : Julia Chatarina
Editór : Rafy Belo
