Prezidente KONISTIL Apela Atu Hametin Pás no Estabilidade

0
103
Prezidente Konsellu Nasionál Izlámiku Timor-Leste, Pascoal Sidik Lemorai

DILI, 5 juñu 2019 (TATOLI)—Prezidente Konsellu Nasionál Izlámiku Timor-Leste (KONISTIL), ohin, fó apelu ba komunidade Musulmanu Timor-Leste katak iha selebrasaun Idul Fitri 1 Syawal 1440 Hijriah tinan 2019, tenke nafatin hametin pás no estabilidade iha nasaun Timor-Leste.

“Ha’u-nia mensajen ohin loron nian, loron boot ba komunidade Musulmanu iha Timor-Leste mak nafatin hametin pás no estabilidade iha ita-nia nasaun Timor-Leste. Ha’u husu harohan ba Maromak para ita-nia ukun-na’in sira bele túr hamutuk, bele rezolve problema ki’ik-oan entre sira ne’ebé iha, nune’e lori ita-nia nasaun Timor-Leste ba oin hanesan nasaun selu-seluk,” dehan Prezidente Konsellu Nasionál Izlámiku Timor-Leste, Pascoal Sidik Lemorai, ba jornalista TATOLI liuhusi entrevista ne’ebé hala’o iha Meskita An’nur, Kampung Alor, Dili, kuarta ne’e.

Nia hatutan, ‘kotib’ ka ema-ne’ebé prezide reza iha selebrasaun Idul Fitri ohin, iha ninia omília foti liu kona-ba asuntu kolaborasaun entre relijiaun iha mundu no mós iha Timor-Leste. Asuntu ida ne’e, nia ohin ko’alia Musulmau (Izlam) la’ós hanesan tuir ema-nia pontu devista ne’ebé lori Musulmanu idéntiku ho radikalizmu no terrorizmu. Maibé, Musulmanu mós hanorin ema atu  hadomi dame no hakuak malu entre relijiaun.

“Ne’e klaru katak Musulmanu la’ós terrorizmu. Foin dadaun ita haree iha Nova Zelándia, akontesimentu ne’e mai hosi ema Musulmanu maibé ema pesoál. Tanba ida ne’e, loron ohin hanesan loron selebrasaun boot komunidade Musulmanu ba Timor-Leste no mós iha mundu, karik halo sala durante tinan ida ne’e nia laran, ohin nia rohan mak ba husu deskulpa ba malu hodi ita hotu hahú fila fali hanesan foin moris hodi hahú serbisu foun fila fali,” Pascoal haklaken.

Tanbasá foku liu-ba asuntu inter-relijiaun, nia hatán, tanba iha mundu, ema ne’ebé uza relijiaun sai polítika sempre ko’alia dehan katak Musulmanu idéntiku ho terrorizmu no  radikalizmu. Maibé, iha Timor-Leste, Musulmanu no relijiaun sira seluk haree malu hanesan família uma laran tanba kuandu problema uituan sempre halai ba kultura.

“Kuandu iha problema entre relijiaun ho relijiaun, maun-boot sira no ukun na’in sira halai ba rezolve ho kultura. Musulmanu (Izlam) mós hanorin hanesan ne’e,” nia esplika.

 

Jornalista: Cancio Ximenes

Editór: Xisto Freitas

HUSIK IDA HATÁN