iklan

NASIONÁL, DILI, POLÍTIKA

Polémika Ró Haksolok, KHUNTO Ezije Prezensa Alkatiri ho José Agustinho iha PN

Polémika Ró Haksolok, KHUNTO Ezije Prezensa Alkatiri ho José Agustinho iha PN

Ró Haksolok. Imajen/Dok. ZEESM.

DILI, 10 juñu 2019 (TATOLI)– Membru Parlamentu Nasionál hosi Bankada KHUNTO, Luis Roberto, husu atu Parlamentu Nasionál bolu Prezidente Autoridade Rejiaun Administrativa Espesiál Oe-Cusse Ambeno (RAEOA), Mari Bin Amude Alkatiri ho Ministru Transportes no Komunikasoins, José Agustinho da Silva, atu bele halo esplikasaun ida sertu  kona-ba polémika ró Haksolok.

Deputadu  Luis Roberto preokupa ho informasaun hosi Mari Alkatiri, ne’ebé dehan, ró Haksolok sei mai, maibé to’o agora ró Haksolok la mosu mai hodi fó ksolok ba povu Timor-Leste.

“Mari Alkatiri fó sai dezde 2017 maibé to’o agora ita la hetan ró nia paradeiru, teki-teki dehan presiza tan osan adisionál millaun $14 hodi konklui ró ne’e,”  hateten Deputadu Luis Roberto, iha plenária Parlamentu Nasionál, Segunda (10/6/2019).

Reprezentante povu iha Parlamentu Nasionál, Deputadu Luis Roberto, husu ba Mari Alkatiri atu marka prezensa iha parlamentu hodi esklarese di’ak tanba saida maka ró to’o agora seidauk mai no tanba saida maka aumenta tan osan adisionál hodi konklui ró ne’e.

Biban ne’e, membru PN hosi Bankada Partidu Demokrátiku, Adriano do Nascimento, haktuir katak, Mari Alkatiri fó sai deklarasaun kuandu jornalista sira entrevista kona-ba ró haksolok ne’e, nia rejeita atu tau osan adisionál millaun $14 tan hodi konklui ró Haksolok. Maibé, osan ho millaun $14 ne’e atu aloka ba projetu Portu Atauro, hadi’a Portu Oe-Cusse no atu hola ró.

Adriano preokupa hodi husu tuir katak, loloos ne’e  deklarasaun Mari Alkatiri nian maka loos ka Ministru Transporte no Komunikasaun nian maka loos, ministru dehan aumenta osan adisionál millaun $14, enkuantu Mari Alkatiri dehan la’e.

Parte seluk, membru Bankada FRETILIN, Maria Angelica Rangel, husu ba ministru José Agostinho ho Mari Alkatiri atu mai parlamentu hodi esplika ró Haksolok atu povu labele hela ho konfuzaun.

“Tenke mai esklarese ró nia paradeiru no nia andamentu iha ne’ebé, atu ita labele halo politizasaun ódiu no vingansa,” afirma Deputada Angelica Rangel.

Iha fatin hanesan, membru Bankada CNRT, Fernanda Lay, lamenta nusa maka ró Haksolok seidauk mai, tanba Estadu entrega hotu ona osan ba kompañia depois sai fali polémika. Loloos ne’e selu tuir prestasaun, hanesan mós ho konstrusaun estrada.

“Ita selu hotu maka ró la mai no aumenta tan osan adisionál, ida ne’e maka preokupasaun ba ita nian. Tuir loloos ró seidauk konklui, ita labele selu osan ho porsentu neen ne’ebé hasai hosi Orsamentu Jerál Estadu. Tanba ne’e maka papél parlamentu nian atu kestiona,” tenik Deputada Fernanda Lay.

Oportunidade ne’e, Ministru Reforma Lejizlativu no Asuntu Parlamentár, Fidelis Leite Magalhães, esplika, Ministru José Agustinho da Silva dehan, nia fó sai ba públiku ne’e bazeia nia vizita ba Portugal hodi ko’alia ho kompañia no kompañia rasik maka informa ba nia katak sei presiza osan adisionál millaun $14 atu konklui ró Haksolok.

Jornalista        : Zezito Silva

Editór              : Francisco Simões

iklan
iklan

Leave a Reply

iklan
error: Content is protected !!