DILI, 19 juñu (TATOLI)-Autór prinsipál iha kazu konfrontu grupu arte marsiál ne’ebé akontese iha Naibonat, Kupang, Timor Osidentál (NTT-sigla indonézia) halai mai subar iha Suku Lakuliu, Postu Administrativu Quelicai, Munisípiu Baucau.
Konfrontu ne’ebé akontese iha loron 6 juñu 2019, iha Naibonat, Kupang, rezulta Ramos Horta mate no na’in haat seluk kanek todan.
Liu tiha loron rua akontesimentu ne’e, suspeitu ho inisiál MP ne’ebé Polisia Kupang konsidera hanesan autór prinsipál ne’e halai sai hosi Kupang hodi tama ilegálmente iha area jurisdisaun Timor-Leste nian, no haku’ur liu ba haksimuk subar Postu Administrativu Baguia, Munisípiu Baucau.
Suspeitu rona ona informasaun katak, autoridade seguransa sira komesa halo operasaun ba nia. Ho nune’e, nia dezvia sai tiha hosi Baguia ba subar hikas fali iha Postu Administrativu Quelicai, Munisípiu Baucau.
Liuhosi koordenasaun no komunikasaun servisu seguransa entre Indonézia ho Timor-Leste indika hetan suspeitu MP ninia ain fatin. Ho nune’e, liuhosi operasaun konjuntu Polisia Investigasaun Kriminál (PNSIK) no Komponente Terrestre FALINTL-Forsa Defeza Timor-Leste (F-FDTL), Tersa (18/6/2019), kaptura duni suspeitu MP nu’udar sidadaun Indonézia iha Suku Lakuliu, Postu Administrativu Quelicai.
Loron ne’ebá kedas, Polisia Investigasaun Kriminál (PNSIK) lori kedas suspeitu ba Komandu Jerál PNTL Dili hodi halo prosesu investigasaun profunda no to’o oras ne’e, suspeitu MP detein hela iha sela Polisia Munisípiu Dili hodi hein relatóriu investigasaun PSIK atu aprezenta ba Ministériu Públiku.
Informasaun hosi Ajénsia notisioza Indonézia nian, ANTARA, fó sai katak, Komandante Polisia Kupang, AKBP Indera Gunawan, orienta ona polisia Indonézia atu kaptura hotu suspeitu balun ne’ebé envolve iha konfrontu organizasaun arte marsiál iha Naibonat, Kupang.
Jornalista : Eugénio Pereira
Editór : Francisco Simões