iklan

NASIONÁL, DILI, SAÚDE

Komunidade Aldeia Adara Proibidu Fuma

Komunidade Aldeia Adara Proibidu Fuma

Imajen Google

 ATAÚRO, 13 juñu 2019 (TATOLI)—Komunidade Aldeia Adara, Suku Beloi, Postu Administrativu Ataúro, Munisípiu Dili, hotu-hotu konkorda la fuma no la fa’an sigaru.

Xefe Aldeia Adara, João da Costa, hateten razaun la fa’an no la fuma sigaru tanba aldeia refere maioria peskadór.

“Ami iha ne’e maioria peskadór. Se ita fuma, ita tún ba tasi okos forsa laiha. Kuandu forsa laiha, perigu ba ita-nia saúde iha tasi okos,” nia haktuir ba Agência Tatoli iha Aldeia Adara, kinta (13/6).

Nia dehan, la fuma ne’e halo komunidade difísil hetan moras. “Iha postu saúde dalaruma pasiente laiha. Ba futuru, ami planeia atu halo regulamentu fuma. Katak, kaer kona fumadór tantu hosi aldeia ne’e no vizitante sira seluk, sei kona multa $20,” Xefe Aldeia Adara tenik.

Aleinde ne’e, Xefe Suku Beloi, Adão Nunes, rekoñese Aldeia Adara la fa’an sigaru, tanba komunidade lahatene fuma.  “Ha’u orgullu ho sira, tanba ambiente iha ne’e ita la hetan sigaru. Ida ne’e di’ak tebes hodi prevene moras oioin,” nia tenik.

Nune’e mós, abitante Ananias Gomes haktuir dezde nia moris iha tinan 1975 liu-ba, to’o ohin loron, nia la hetan komunidade iha aldeia refere fuma no fa’an sigaru.

Enkuantu, doutór ne’ebé fó asisténsia iha Aldeia Adara, David Martins orgullu ho ambiente iha área refere, tanba maioria lahatene fuma. Komunidade iha Aldeia Akara, mane hamutuk  92, feto 98, uma kain iha 44 no totál komunidade 190. Maioria komunidade ne’e relijiaun protestante.

 

Jornalista: Evaristo Soares Martins

Editór: Xisto Freitas

iklan
iklan

Leave a Reply

iklan
error: Content is protected !!