Komisaun B Husu Diplomata TL Iha RI Akompaña Kazu Timoroan Na’in Rua

0
352
Membru Parlamentu Nasionál, Adérito Hugo da Costa. Imajen Tatoli/Egas Cristóvão

DILI, 03 juñu 2019 (TATOLI) –Komisaun B Parlamentu Nasionál (PN) ne’ebé trata asuntu Defeza no Seguransa, husu ba misaun diplomata Timor-Leste (TL) iha Repúblika Indonézia (RI) atu akompaña prosesu investigasaun ba Timoroan na’in rua ne’ebé Servisu Alfándega Atambua prende iha Fronteira Mota Ain, foin lalais ne’e.

Timoroan na’in rua  ne’ebé Servisu Alfándega Atambua, Provínsia Kupaun,  Timor Osidentál,  prende, foin lalais ne’e, tanba lori ai-moruk ne’ebé deskonfia droga atu ba fa’an iha Kupaun-Indonézia.

“Ita nia misaun diplomátiku iha Indonézia iha obrigasaun no responsabilidade atu akompaña prosesu tomak hosi Timoroan kazál ne’ebé hatama droga liuhosi Mota-Ain atu ba Atambua tanba sistema Indonézia nia uza pena morte enkuantu Timor-Leste (TL) la iha,” hateten Prezidente Komisaun B PN, Adérito Hugo da Costa ba Ajénsia TATOLI, ohin iha PN.

 Deputadu Adérito Hugo hein katak Indonézia sira ho nia kapasidade atu deteta kazál Timoroan no autoridade Timor-Leste mós tenke aproveita másimu posivel ho autoridade sira Indonézia nian buka investiga to’o nia abut sira.

Atu lori timoroan na’in rua mai TL, Hugo dehan, problema maka TL ho Indonézia seidauk iha akordu estradisaun, entaun kazu ne’ebé envolve hosi timoroan na’in rua tenke rezolve ho lei Indonézia nian.

“Ita hotu akompaña ida ne’e katak ba oin ne’e oinsá ho kestaun akordu estradisaun ne’ebé entre Timor-Leste ho Indonézia seidauk iha,” hateten Adérito Hugo.

Hugo salienta katak, iha tinan barak nia laran ema duun Timor-Leste katak sai fatin tránzitu ba droga, tanba saida maka autoridade Timoroan la antesipa, nusa maka la halo prevensaun antesipada kedan.

“ Akontese maka ita foin hakfodak, ida ne’e ita moe tebes. Ita kria deskontentamentu tanba ita fraku iha kontrolu fronteira, loloos ita nia mós halo di’ak atu nune’e ita bele kombate duni atividade proibidu sira ne’e,” hateten Adérito Hugo.

Hugo husu ba sidadaun sira atu kuida hodi labele monu ba tentativa sira hanesan kazál Timoroan na’in rua nia, atu ba li’ur maka ema ruma fó sasán ruma atu lori tenke hatene sasán saida maka ne’e.

“Ita hein katak sira na’in rua lahatene buat ida no ema maka aproveita de’it. Maibé ida ne’e ita hein investigasaun atu hatene nia motivu,” tenik Adérito Hugo.

Komisaun B hanoin katak kazu ne’e hanesan traballu ida sériu no parte hothotu tenke tau atensaun ka haree ida ne’e, atu ba futuru tenke kombate droga sira.

Hugo preokupa kapasidade Servisu Migrasaun nian atu deteta droga tanba la konsege hetan ai-moruk droga ne’ebé tama mai no sai hosi TL.

“Ita nia kapasidade atu deteta droga ne’e iha ka la’e, se la iha problema ne’e saida, rekursu umanu maka la sufisiente, ema maka la treinadu ka ekipamentu ne’ebé atu deteta maka la iha,” Hugo kestiona.

Jornalista      : Zezito Silva

Editór            : Francisco Simões

HUSIK IDA HATÁN