DILI, 03 Juñu 2019 (TATOLI)—Família hosi JSP no AS ne’ebé deskonfiadu lori aimoruk droga iha semana kotuk tama ba Mota-ain, Atambua-Indonézia, ejize ba Estadu Timor-Leste no Estadu Indonézia atu liberta kazál ne’e tanba konsideradu inosente.
Família sira husu ba Komandu Polísia Nasionál Timor-Leste (PNTL) liliu Polísia Nasionál Serbisu Investigasaun Kriminál (PNSIK) atu kaer de’it Diretór Kompañia Juk Internationál Moves inisiál JGB ho nia espoza inisiál M nu’udar supeitu ne’ebé autoriza sira-nia oan mane ho nia kaben kumpri desizaun patraun hodi lori mákina impresora mutin tipu EPSON A4 atu ba Kúpaun iha 28 maiu 2019.
Família sira lamenta, sente hafodak no trauma, bainhira rona Autoridade Afándega Indonézia prende sira nia oan tanba lori aimoruk droga tipu pil hamutuk musan 4.874 nu’udar lasu ida hosi patraun atu halo sira nia-oan sai vítima.
“Ami husu atu Estadu Timor-Leste no Estadu Indonézia bele deskuti prosesu liberta ami-nia maun (JSP) ho nia kaben (AS) ne’ebé sai vítima ba sira-nia patraun, maibé la’ós ho intensaun atu lori fali aimoruk droga ida ne’e tama ba iha ema nia nasaun,” Reprezentante Família, Francisco Luís Soares ba jornalista liuhosi konferénsia ba imprensa iha rezidénsia Suku Bairru-Pité, Dili, ohin.
Nia dehan, família inklui kazál nia oan na’in tolu sei ki’ik mós sente trauma no tanis hodi husu atu PNTL kaptura na’in ba kompañia ne’ebé haruka ema na’in rua ne’e ba.
Francisco dehan, mákina impresora ne’e patraun JBA haruka lori ba Kupan, maibé ho dirasaun la klaru no tau de’it númeru telefone Indonézia nian.
“Ami rona de’it maun dehan atu lori mákina ne’e ba Lippo Plaza Kúpaun, maibé atu ba dirasaun ne’ebé ne’e mós nia lahatene, tanba maun foin primeiravez ba Kúpaun no sasán ne’e tau de’it númeru telefone,” nia esplika.
Iha fatin hanesan, Isabel da Silva Araújo, nu’udar inan hosi JSP no AS husu kompañia atu responsabiliza ba kazu ne’e, tanba sira-nia oan inosente ka lahatene problema.
“Nu’udar inan ha’u sente laran moras tebes, tanba ha’u nia-oan lahatene buat ida. Ha’u husu ba kompañia atu responsabiliza no husu Estadu Timor-Leste atu prosesu kazu ne’e, ”dehan Isabel ho tanis.
Nu’udar família sira rasik hato’o ona keixa ne’e ba PNTL atu investiga patraun ba kompañia ne’ebé autoriza sira-nia oan lori sasán ne’e ba Kupan.
“Ami ba fó hatene ona ba PNTL no sira (PNTL) dehan kaptura ona patraun ne’e hodi hein prosesu investigasaun,” nia katak.
Iha fatin hanesan, António da Costa nu’udar aman husu atu PNTL lori evidénsia na’in ka droga ne’ebé sita ona hodi hato’o ba Polísia Atambua-Indonézia hodi liberta fali nia oan.
Hanesan aman, nia haktuir, nia sente trauma bainhira rona notisia sira-nia oan atu ba Kúpaun hetan fali kapturasaun nu’udar autór droga ne’e la loos, tanba durante ne’e iha família sira rasik nunka eduka oan atu envolve iha kazu droga.
António dehan, ninia oan hahú serbisu ho kompañia ne’e hahú kedas iha tinan 2017 nu’udar broker ba kompañia trata sasán importasaun ne’ebé haruka hosi rai li’ur mai Timor-Leste.
Aleinde ne’e, Reprezentante Kompañia Juk International Movers, Júlio Pereira dehan sira mós hafodak bainhira rona PNSIK prende sira nia patraun JGB ho nia espoza M nu’udar suspeitu ba aimoruk droga.
Julio esplika, mákina impresora mutin tipu EPSON A4 ne’e haruka hosi rai li’ur mai nu’udar traballadór sira la hatene, tanba patraun maka trata direta dokumentu hotu- hotu hodi haruka sira nia kolega JSP ho nia espoza AS lori ba Kupan ho diresaun ne’ebé la klaru.
Nia hatutan, sasán sira ne’e lori mai sira mós la sobu no la hatene dehan iha aimoruk droga tau iha laran, tanba patraun la fó hatene ba sira.
“Mákina printer mutin tipu EPSON A4 lori hosi rai li’ur mai tula iha aviaun Sriwijaya liu mai Aeroportu Internasionál Komoro, Dili, antes loron páskua (fulan marsu). Kompañia Juk International Movers mak trata dokumentu lori mai rai iha ne’e kle’ur ona,” dehan Júlio ba jornalista sira iha edifísu Kompañia Juk International Movers, Fomento, Comoro, ohin.
Nia dehan, sira nia kolega JSP ho nia espoza AS nu’udar vítima, tanba kompañia haruka sasán ne’e ba Kúpaun ho dirasaun ne’ebé la klaru to’o ikus Alfándega Indonézia kaptura fali sira na’in rua.
“Ami sente hakfodak no triste tebes tanba kolega ne’e hanesan vítima, tanba patraun maka haruka lori sasán ba Kupan maibé ho nia diresaun la klaru,” nia lamenta.
Entretantu, oras ne’e dadaun, suspeitu rua, feen-laen, sei detein hela iha prizaun Atambua–Indonézia hodi hein prosesu justisa.
Jornalista: Eugénio Pereira
Editór: Xisto Freitas
