DILI, 30 juñu 2019 (TATOLI)—Ekipa Atlético Ultramar hosi Manatuto hurlele armada Boavista FC de Timor ho golu 3-2 liuhusi jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin lorokraik.

Golu ne’ebé lori ekipa idéntiku ho “balsaun” ne’e ba viória atribui hosi Fabio Christian (10) iha minutu 22, 80 no golu ikus marka hosi Jorge Godinho (22) iha minutu 40. Entretantu, golu rua hosi Boavista marka hosi Rafael Marti iha minutu 35 no 76.

Asistente treinadór Boavista FC, Miro Valdo lamenta ho desizaun árbitru tanba foti desizaun ba nia jogadór la justu, liliu fó kartaun mean ba jogadór avansadu, Danilson Araújo (11).

Nia afirma, loloos, árbitru Nívio Fernandes labele dirije jogu bainhira sira nia ekipa joga. “Ami sente triste tebes. Jogu ohin ne’e kapa’as loos maibé árbitru mak estraga tiha jogu. Loloos, ami hato’o ona karta ba sira. Nia (Nívio) labele huu iha ami nia ekipa joga tanba iha semana kotuk liu-ba ami joga nia fó kartaun ba ami nia jogadór arbiru de’it,” tenik Miro.

Nia reafirma, sira nafatin halo tan karta ida hodi dirije ba ekipa árbitrajen hodi hapara Nívio labele dirije jogu bainhita Boavista joga. “Ami orsida ba, konvoka estrutura atu halo nafatin karta ida hodi haruka ba sira (arbitrajen),” tenik nia.

Tuir Miro katak oinsá mak atu lori futeból Timor-Leste ba oin bainhira árbitru dirije jogu la profisionál.

Kontra atake entre jogadór Boavista FC no Atlético Ultramar. Imajen Mídia LFA

Iha sorin seluk, treinadór Atlético Ultramar, Gaspar Pinto sente haksolok ho rezultadu ne’ebé nia ekipa hetan. “Ha’u la espera katak ami atu manán Boavista tanba sira ekipa ne’ebé boot no forsa. Sira-nia treinadór ema estranjeiru ne’ebé iha esperiénsia luan kona-ba bola kompara ho ha’u,” dehan Gaspar.

Nia hatutan, ba oin nia sei serbisu maka’as hodi hadi’a Ultramar labele tuun ba Segunda Divizaun maibé tenke mantein nafatin. “Bainhira ekipa fó fiar nafatin mai ha’u, ha’u sei serbisu maka’as liu-tan hodi mantein Ultramar labele monu ba Segunda Divizaun,” hateten treinadór ne’e.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here