Salvador da Silva "Asala"

DILI, 30 juñu 2019 (TATOLI)Ha’u kuandu ba kaer Aitana FC, ha’u iha mehi katak tenke lori ekipa ne’e to’o susesu. Ohin loron susesu duni. Susesu ida ne’e ba oin ona, sei labele tuun tan.

Susesu duni! Susesu ida ne’e nia dikin sei nani beibeik ba leten no sei la fó tempu atu nani tuun fila fali ba nia hún (Segunda Divizaun).

Hanesan Jesus Kristu salva ema hosi sala, Asala salva ekipa Aitana FC ne’ebé molok ne’e lakon ona esperansa atu fila hikas ba Primeira Divizaun. Ho ninia lideransa, nia konsege foti ekipa ne’e (Aitana) fila hikas ona ba Primeira Divizaun.

Nia hanesan salvadór ida (penyelamat-termu Indonézia) tanba ninia naran Salvador. Ba nia, tenke iha mehi iha moris nia laran, labele moris iha mehi-laran. Katak, moris ida nia objetivu tenke lori moris ne’e iha ninia objetivu rasik.

Salvador da Silva “Asala”

Asala, naran ida la’ós foin hahú buras. Naran ida ne’e buras hori Liga Lorosa’e (1996-1998) hahú iha ne’ebé nia reprezenta klube koñesidu sira hanesan Rusa Fuik, Esperansa, Cacusan no selu-seluk tan iha altura ne’ebá. Naran ida ne’e mós, buras ona iha doben sira-nia fuan hahú hosi tempu ne’ebá mai. He-he-he.

Susesu ida ne’e, Asala ne’ebé ho naran kompletu Salvador da Silva ne’e hateten, liuhosi kooperasaun no serbisu hamutuk entre estrutura hotu mak ohin loron Aitana sa’e ona ba Primeira Divizaun.

Bainhira hamutuk ho Aitana, Asala iha ona hanoin no mehi tenke lori ekipa refere fila hikas ba fatin anteriór no lakohi atu tuun fali ba Segunda Divizaun.

“Ha’u kuandu ba kaer Aitana FC, ha’u iha mehi katak tenke lori ekipa ne’e to’o susesu. Ohin loron susesu duni. Susesu ida ne’e ba oin ona, sei labele tuun tan,” tenik Asala ba mídia LFA iha edifísiu Federasaun Futeból Timor-Leste (FFTL), Bairru Formosa, foin lalais ne’e.

Antes kaer Aitana, Salvador hanesan treinadór ba Sentru Juvenil ne’ebé hetan fiar hosi FFTL iha tinan 2014 to’o 2017. Iha tinan 2017, nia tuir formasaun kona-ba treinadór hosi Association Football Confederation (AFC) no oras ne’e nia sai treinadór ona iha kategoria nível C.

Iha tinan 2015, Asala hanesan mós jogadór prinsipál Aitana FC iha ne’ebé altura ne’ebá konsege lori Aitana sai kampiaun ba Tasa 12 Novembru ba dahuluk. Bainhira Aitana tuun ba Segunda Divizaun, iha tinan 2017, Asala hetan konfiansa hosi estrutura klube Zebra FC hodi reforsa fali ekipa refere to’o époka ida no iha tinan 2018 Asala fila hikas ba Aitana hodi hala’o nia jogu ikus iha Aitana ho idade 43. Parabéns Asala.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here