Asinatura Akordu 5 maiu 1999 iha Nova Iorke entre reprezentante Indonézia, Portugal no Sekretáriu Jerál organizasaun Nasaun Unida, Kofi Anan. Imajen espesiál

DILI, 29 juñu 2019 (TATOLI)—Hatene hodi hakarak. Maun-alin alin maun, see tilun mai. Oh! Rona maun-alin sira, oh! Ita mesak oan-ki’ak, mesak ema-ki’ak. Mesa-mesak oan-ki’ak, mesa-mesak ema-ki’ak. Tansá, tan sé, tanbasá.

Tan matan ema taka, neon ema taka. Tan ema taka dalan, ema deo dalan. Neon atu nakloke, matan atu haree. Ita sei haree, ita sei hakarak. Atu sei hakarak, ita sei hatene. Hatene tansá, ita nune’e hela.

Dadolin kmanek hosi Poeta timoroan, Francisco Borja da Costa, ho titulu “Hatene hodi Hakarak” ne’e fó hanoin ba ita timoroan sira  atu “hatene” timoroan nia “hakarak” tomak ne’ebé hakarak duni atu hatene “Kaer Kuda Talin Rasik” no hatene “Rasik Kaer Kuda Talin”.

Asinatura Akordu 5 maiu 1999 iha Nova Iorke entre reprezentante Indonézia, Portugal no Sekretáriu Jerál organizasaun Nasaun Unida, Kofi Anan. Imajen espesiál

Iha biban ne’ebá (1999),  timoroan sira ne’e “hakarak” atu “hatene” kaer sira-nia kuda talin rasik (pro-independénsia), timoroan seluk ne’ebé “hakarak” kaer ema seluk nia kuda talin (pro-integrasaun) halo violénsia hodi oho timoroan maluk hanesan oho balada fuik. Governu Indonézia esforsu-án hodi estraga tiha akordu 5 maiu 1999 ho fahe kilat ba ema sivíl ka milísia timoroan sira ne’ebé hetan kontrola hosi TNI (Tentara Nasional Indonesia). Hakarak “Hatene hodi Hakarak”, ita mós hakarak hodi hatene kona-ba akordu 5 maiu.

Akordu 5 maiu

Iha loron 5 maiu 1999, Indonézia, Portugal no Organizasaun Nasaun Unida (ONU) atinje akordu kona-ba Timor-Timur iha Nova Yorke. Akordu 5 maiu Nova Yorke ne’e akumula akordu tolu ne’ebé prinsipál;

Dahuluk, “Akordu entre Governu Indonézia no Portugal kona-ba problema Timor-Timur” (Agreement between the governments of Indonesia and Portugal regarding the East Timor question).

Daruak, “Akordu kona-ba kria seguransa ba Determinasaun Konsulta Populár ba povu Timor-Timur” (Agreement on Organizing the Security of the Popular Consultation in East Timor).

Datoluk, “Akordu kona-ba Modalidade Determinasaun Konsulta Populár liuhusi votasaun (Agreement on Modalities for the Popular Consultation of the people of East Timor through direct ballot).

 Atu “Hatene hodi Hakarak” no hatene kle’an liu-tan, iha loron 5 maiu 1999, Governu Indonézia no Governu Portugal, asina akordu 5 maiu iha Nova Yorke, Estadu Unidu Amérika. Akordu ne’e asina hosi Ministru Negósiu Estranjeiru Indonézia nian, Ali Alatas no Ministru Negósiu Estranjeiru Portugal, Jaime Gama. Sekretáriu Jerál Organizasaun Nasaun Unida (ONU) nian, Kofi Anan mak sai sasin ba akordu ne’e. Akordu 5 maiu ne’e, atu:

  1. Sekretáriu Jerál ONU atu tau proposta espesiál autonomia ba Timor-Timur (atuál Timor-Leste) iha Repúblika Indonézia, ba timoroan hotu, atu konsidera no aseita ka rejeita liuhusi Konsulta Populár ida ne’ebé direta, segredu, no bulletin universál.
  2. Sekretáriu Jerál ONU atu harii misaun ONU ida imediata iha Timor hodi hala’o Konsulta Populár ho efetivu.
  3. Governu Indonézia sei responsável ba mantein pás no seguransa iha Timor hodi asegura katak Konsulta Populár halo ho justu no pás iha ambiente ida livre hosi intimidasaun, violénsia, no interferénsia hosi parte ruma.
  4. Sekretáriu Jerál ONU atu relata rezultadu Konsulta Populár ba Konsellu Seguransa no Asembleia Jerál ONU nian, nune’e mós atu informa ba Governu Indonézia no Portugal no timoroan hotu.
  5. Karik Sekretáriu Jerál determina, bazeia ba rezultadu Konsulta Populár no tuir Akordu 5 maiu ne’e, katak proposta plataforma konstitusionál autonomia espesiál aseita hosi ema Timor, mak Governu Indonézia foti medida konstitusionál hodi implementa proposta plataforma konstitusionál ne’e, no Governu Portugés tenke hasai ona Timor hosi lista Territóriu Naun-Autónomu Asembleia Jerál no hasai problema Timor hosi ajenda iha Konsellu Seguransa no Asembleia Jerál nian.
  6. Karik Sekretáriu Jerál determina, bazeia ba rezultadu Konsulta Populár katak ema timoroan rejeita autonomia espesiál, maka Governu Indonézia tenke foti medida konstitusionál hodi termina nia relasaun ho Timor bazeia ba Indonézia nia lei kona-ba estatutu Timor-Timur (Timor-Leste) nian 17 jullu 1976, no Governu Indonézia no Portugal no Sekretáriu Jerál ONU konkorda kona-ba medida sira hodi transfere autoridade iha Timor ba ONU iha pás no órden.
  7. ONU sei mantein nia prezensa iha Timor durante periodu hafoin Konsulta Populár no komesa implementa rezultadu hosi Konsultá Populár.

Tansá?

Tan sé?

Tanbasá?

Tan matan ema taka, neon ema taka

Tan ema taka dalan, ema deo dalan

Neon atu nakloke, matan atu haree

Ita sei haree, ita sei hakarak

Atu sei hakarak, ita sei hatene

Hatene tansá, ita nune’e hela.

Jornalista: Cancio Ximenes

Editór: Xisto Freitas       

Klik mós notísia iha kraik atu lee…

http://www.tatoli.tl/2019/06/rai-hun-mutin-sae-dadaun-ona/

http://www.tatoli.tl/2019/06/rai-hun-mutin-sae-dadaun-ona-ii/

http://www.tatoli.tl/2019/06/rai-hun-mutin-sae-dadaun-ona-iii/

http://www.tatoli.tl/2019/06/rai-hun-mutin-sae-dadaun-ona-iv/

http://www.tatoli.tl/2019/06/rai-hun-mutin-sae-dadaun-ona-v/

http://www.tatoli.tl/2019/06/rai-hun-mutin-sae-dadaun-ona-vi/

http://www.tatoli.tl/2019/06/rai-hun-mutin-sae-dadaun-ona-vii/

HAKEREK NO HATÁN

Please enter your comment!
Please enter your name here