Eis Primeiru-Ministru, Kay Rala Xanana Gusmão asiste jogu entre AS Ponta Leste no Assalam FC, ohin lorokraik. Imajen Mídia LFA

DILI, 29 juñu 2019 (TATOLI)–Ekipa AS Ponta Leste hikis Assalam FC ho golu 2-1. Rezultadu ida ne’e, lori ekipa refere túr iha pozisaun primeiru lugár hodi lidera tabela klasifikasaun provizóriu ho pontu 12 no Assalam tenke mantein nafatin iha kintu lugár ho pontu 7.

Golu ne’ebé lori Ponta Leste ukun tabela klasifikasaun provizóriu prodúz hosi jogadór estranjeiru ho nasionalidade Gana, Daniel Donkor (20) iha minutu 44 no Veh Donald (23) iha minutu 52. Enkuantu, golu úniku hosi Assalam marka hosi Edit Sávio (9) iha minutu 39.

Jogadór Assalam FC (faru matak) halo xutu bola ba guara rede AS Ponta Leste. Imajen Mídia LFA

Jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin lorokraik ne’e, dirije hosi árbitru Pedro Carvalho, juiz liña Filomeno da Silva, Elísio Reis no árbitru rezerva, Cristovão Alves.

Hafoin jogu ramata, ba jornalista sira, treinadór Assalam FC, Francisco Araújo konfesa katak derrota ne’ebé nia ekipa hetan tanba jogadór la kompletu, kauza hosi jogadór balun hetan kartaun mean iha jogu hira liu-ba.

“Ohin ami lakon ne’e tan de’it jogadór prinsipál la kompletu. Jogadór ne’ebé ativu hamutuk 12 de’it, troka laiha,” tenik Francisco.

Aleinde ne’e, nia hameno ba árbitru atu dirije jogu ho neutru no matan moris. “Ita bele dehan golu primeiru ne’ebé Ponta Leste halo ne’e loloos la vale tanba jogadór ne’e lori nia liman baku sai tiha mak hatama golu maibé árbitru haree maibé la huu árbitu. Ida ne’e mak ami la simu,” tenik treinadór ne’e.

Iha sorin seluk, treinadór AS Ponta Leste, Eduardo Pereira afirma, nia sente kontente ho rezultadu ne’ebé nia ekipa hetan tanba jogadór hotu joga ho disiplina no halo tuir orientasaun ne’ebé nia fó.

“Ha’u kontente tanba ohin ami bele gaña tan pontu 3. Ba oin, ami sei serbisu maka’as nafatin atu hetan vitória,” nia tenik.

Fó hanoin hikas katak tabela klasifikasaun provizóriu lidera hosi Ponta Leste ho pontu 12, segundu lugár Boavista ho pontu 10, terseiru lugár Lalenok United ho pontu 9, kuartu lugár AD SLB ho pontu 7, kintu lugár Assalam ho pontu 7 (SLB ho Assalam pontu hanesan maibé diferente golu), sestu lugár Ultramar ho pontu 3, sétimu lugár Karketu ho pontu 1, oitavu lugár Académica FC ho pontu zero.

            Xanana Partisipa

Entretantu, eis Primeiru-Ministru, Kay Rala Xanana Gusmão mós partisipa diretamente jogu entre AS Ponta Leste no Assalam FC iha Estádiu Munisipál Dili, ohin.

Prezensa líder nasionál ne’e halo adeptu sira iha fatin refere haksolok. Iha biban ne’e, atuál prezidente klube AD SLB Laulara ne’e hola aifuan hodi fahe ba adeptu sira no hakilar ba kampu laran hodi fó suporta ba ekipa rua ne’ebé joga.

Iha tribun leten, Xanana dehan ba adeptu sira: “Ohin imi mai asiste Assalam ho Ponta Leste, keta haluha semana oin mai asiste fali SLB nia jogu,” katak Xanana.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here