Sekretáriu Estadu Komunikasaun Sosiál, Merício Juvenal dos Reis 'Akara'. Imajen Tatoli/ Egas Cristóvão

LIZBOA, 28 juñu 2019 (TATOLI)-Sekretáriu Estadu Komunikasaun Sosiál (SECOMS-sigla portugés), Mericio Juvinal dos Reis “Akara”, ohin, iha Lizboa, Portugál, hasoru malu ho Sekretária Estadu Negósiu Estranjeiru Portugal, Teresa Ribeiro, hodi ko’alia kona-ba oinsá Timor-Leste, Portugal no Argentina, asina akordu triangulár ida atu apoiu jornalista timoroan sira iha area dezeñu gráfiku no lingua portugeza.

“Ha’u hetan delegasaun kompeténsia husi ita-nia Konsellu-ministru, ne’ebé, ha’u iha ona kompeténsia atu asina ho governu rua, Portugal no Argentina kona-ba akordu triangulár,” informa Sekretáriu Estadu, Mericio Juvinal dos Reis “Akara” ba jornalista sira.

Governante ne’e akresenta, depois asina, nivel operasionál sei diskute bainhira atu implementa akordu hirak ne’e. “Maibé ita-nia hanoin liuliu iha area dezenvolvimentu kapitál umanu”.

Nia esplika, akordu triangulár ne’e katak nasaun tolu ne’e sei asina hamutuk atu apoiu jornalista timoroan sira.  “Ha’u hanoin ida ne’e mak di’ak liu, aproximasaun multilateral. Rekursu ne’ebé mak nasaun tolu ne’e iha tau hamutuk hodi bele apoia ita-nia jornalista sira”.

Kona-ba vizita traballu ne’ebé sekretáriu estadu halo ba RTP (Radio e Televisão Portuguesa) no Ajénsia Lusa, nia parte dehan ona ba Prezidente RTTL-EP (Radiu no Televizaun Timor-Leste, Empreza Publika), Francisco da Silva Gari no Prezidente TATOLI.IP-Ajénsia Informasaun Ofisial Estadu Timor-Leste, Jose da Costa katak nivel tékniku prepara ezbosu akordu ida, ne’ebé bele mensiona mós kona-ba formasaun ba jornalista ka jornalista sira iha órgaun komunikasaun social rua, bele hala’o mós estájiu profisionál iha RTP ho Lusa.

“Buat ida importante mak la’ós kolaborasaun em termos de rekursu umanu, maibé ita mós diskute kona-ba oinsá fahe konteúdu, programa entre RTP, RTTL, Ajénsia Lusa ho mós Ajénsia TATOLI. Ne’e importante, tanba ita presiza notisia di’ak la’ós konsumu de’it iha rai laran, maibé promove mós ita-nia nasaun ba rai li’ur. Téknikamente prezidente RTTL no TATOLI sei diskute kle’an”.

“Em termos de polítika ita iha ona entendimentu ba malu, la iha problema señora Ministra ne’ebé tutela ba area komunikasaun iha ne’e kontente i hasoru ita. Ita mós hanoin katak enkontru ne’e importante i espera enkontru tan ho sekretáriu estadu kooperasaun Portugal nian ita bele diskute tan area kooperasaun seluk ne’ebé mak sei liga ba komunikasaun sosiál,” hateten Mericio Akara.

Iha biban hanesan, Sekretáriu Estadu Komunikasaun Sosiál, Mericio Juvinal dos Reis “Akara” hateten katak media pilár importante iha demokratizasaun Timor-Leste nian tanba ne’e nia konsidera tebes kompeténsia jornalista sira nian.

“Sira mak sai fontes informasaun iha ita-nia rain. Entaun, sira-nia kompeténsia, serbisu tuir kódigu étika jornalizmu nafatin maibé mós iha responsabilidade ba ita-nia nasaun. Katak, tenke promove mós ita-nia nasaun, halo kobertura mós parte pozitivu ita-nia nasaun nian para ita mós divulga iha mundu para hatudu katak Timor nasaun ki’ik maibé iha poténsia barak ne’ebé mak nasaun seluk bele konsidera, bele halo kolaborasaun”.

“Kompeténsia mídia Timor ne’e importante. Ita sei apoiu ita-nia mídia, jornalista sira para halo serbisu di’ak liu, aumenta kualidade di’ak liu tan para ita-boot sira (jornalista sira) nia nivel mós hanesan nasaun seluk,” kompromete sekretáriu Estadu Mericio Akara.

Notisia relevante: http://www.tatoli.tl/2019/06/jornalista-30-sei-sai-benefisiariu-ba-programa-kooperasaun-triangular/

Jornalista      : Rafy Belo

Editór            : Francisco Simões

HAKEREK NO HATÁN

Please enter your comment!
Please enter your name here