Udan boot halo Auto Estrada iha parte Suku Oques, Postu Administrativu Maucatar no Suku Labarai, Postu Administrativu Suai Vila kotu hodi halo rai halai taka estrada. Imajen/Eugénio Pereira

COVALIMA, 28 juñu 2019 (TATOLI)-Prezidente Repúblika, Francisco Guterres Lú Olo, preokupa ho kondisaun auto estrada ne’ebé kotu iha Suku Oques, Postu Administrativu Maucatar no iha Suku Labarai, Postu Administrativu Suai Vila, Munisípiu Covalima.

Auto Estrada iha Suai ne’ebé monu tanba udan boot, foin allais ne’e. Imajen/Eugénio Pereira

Prezidente Repúblika husu ba Governu atu  koordena ho kompañia ne’ebé halo projetu para rezolve no  hadi’a hikas estrada ne’e para  fasilita di’ak liután movimentu transporte públiku.

PR Lú Olo dehan, iha ninia vizita primeiru Covalima hodi halo diálogu ho povu Covalima bainhira ho komitiva ho karreta la’o hale’u sidade Covalima kondisaun infraestrutura estrada komesa di’ak liu munisipiu seluk, maibé triste bainhira haree auto estrada ne’e udan boot tun maka’as sobu rai monu taka estrada too agora seidauk rezolve.

PR apresia mós ho progresu dezenvolvimentu infraestrutura ne’ebé Governu halo, hanesan harii Aeroportu Internasionál Komandante em Xefe FALINTIL, Kay Rala Xanana Gusmão no projetu estrada iha Suai Vila.

“Ami liu mai too Aeroportu haree di’ak no kapás.  lokraik liu ba Suku Oques, ami liuhusi auto estrada kapás, furak  no kabeer tebe-tebes, too ponte ida iha ne’ebá too Zumalai estrada tohik iha dalan klaran udan been estraga tiha hotu,”  hateten PR Lú Olo iha  nia diskursu bainhira halo diálogu aberta ho povu Munisípiu Covalima, ohin, iha edifísiu Feto Santa Rosa, Covalima.

Auto Estrada ne’e, VIII Governu Konstitusionál foin inaugura iha loron 17 Novembru 2018 ne’ebé liga estrada husi Munisípiu Covalima ba Fatuka, Postu Administrativu Zumalai ho distánsia kilómetru 30.3.

Obra auto estrada  ne’e gasta orsamentu tokon $304 ne’ebé ezekuta husi Kompañia Internasionál China Overseas Engineering Company-China Railway First Group Joint Venture (COVEC-CRFG JV).

Estrada ne’e Governu halo nu’udar  kondisoens baziku ba dezenvolvimentu infraestrutura supply base no liga ba Refinaria Betanu, no LNG Beacu-Viqueque, inklui fasilita distribuisaun lojístika no produtu agríkola ba merkadu nasionál.

Lú Olo dehan, liuhusi estrada ne’ebé halo hodi responde ona preokupasaun povu kona-ba dezenvolvimentu infraestrutura estrada, maibé husu atu hadi’a mós estrada liga ba suku no aldeia ho di’ak liután.

Responde ba preokupasaun ne’e, Vise Ministru Obras Públika (MOP), Nicolao dos Reis, esklarese katak, governu halo ona identifikasaun ba estrada ne’e no sei koordena ho kompañia hodi hadi’a fila fali estrada ne’e.

“Obrigadu ba na’i prezidente bele konvida ona ha’u mai hatán hodi rona preokupasaun povu nian kona-ba problema estrada iha Covalima. Iha planu mestre VIII Governu nian sei hadi’a estrada sira ne’e tuir Planu Estratéjiku Dezenvolvimentu Nasional (PEDN) 2011-2030,” Nicolao hateten.

Nia dehan, MOP kria tiha programa mestre ba tinan lima sei hadi’a estrada no ponte liga ba suku too aldeia hotu-hotu.

Tuir observasaun Ajénsia TATOLI nota katak, auto estrada iha parte besik Suku Oques, Postu Administrativu Maucatar, udan boot iha  fulan hirak liubá halo monu ho distánsia metru 20 husi foho leten tun lori fatuk boot taka tomak estrada. Nune’e mós, iha parte Suku Labarai, Postu Administrativu Suia Vila, besik Aeroportu Suai rai halai halo estrada nakfera kuak naruk ho distánsia metru 7 liu.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here