PR Lú Olo ho nia espoza, Cidália Nobre Lopez Mouzinho Guterres, vizita pasiente sira iha Ospitál Referral Suai, Covalima, Kinta (27/06/2019). Imajen/Eugénio Pereira

COVALIMA, 28 juñu 2019 (TATOLI) – Prezidente Repúblika Francisco Guterres Lú Olo, apresia ho servisu brigada saúde Timoroan hamutuk ho Kubanu hodi fó asisténsia saúde ba povu sira.

Xefe Estadu Lú Olo hato’o apresiasaun ne’e bainhira hamutuk ho nia espoza Cidália Nobre Lopez Mouzinho Guterres ne’ebé akompaña mós husi Vise Ministra Kuidadu Saúde, Élia dos Reis Amaral no membru governu halo vizita no observa Ospitál Referral Suai, Covalima, hodi haree kondisaun servisu no dezafiu ne’ebé ospitál enfrenta.

“Ha’u orgullu ho imi hotu nia atendimentu. Kontinua halo di’ak liután,  haree ita nia povu sira nia saúde, imi nia responsabilidade boot liu mak atu salva ita nia sidadaun  sira nia saúde,” apela PR Lú Olo.

Nia husu atu médiku sira halo servisu professional no uza matenek hotu atu ajuda kura pasiente nia moras ho domin hodi hetan satisfás ho atendimentu di’ak ema ne’ebé bele rekupera saúde.

Iha vizita ne’e, PR Lú Olo ho nia espoza konversa hodi pasiente no pesoál saúde sira nu’udar jestu domin ba pasiente sira ho mós pesoál saúde sira ne’ebé fó hela tratamentu ba pasiente sira.

Diretór Ospitál, Bernardino da Silva Guterres, agradese ho vizita ne’e hodi introdús servisu ospitál nian, inklui atividade sira ne’ebé hetan apoiu husi Médiku Brigada Kuba na’in ualu (8).

Ospitál Suai iha kama 24 hanesan mós ospitál referral iha Maliana- Bobonaro no Maubisse- Ainaro nian.

Estrutura Konsellu Administrasaun Ospitál kompostu husi diretór haat (4), Xefe Departamentu ualu (8), no médiku espesialidade hamutuk lima (5), na’in haat (4) husi Brigada médiku Kubanu, no ida husi kontratadu iha área internista, Sirurjia no Urolojia.

Durante ne’e área servisu apoiu klínika no diagnostika no terapéutika haree ba situasaun emerjénsia, konsulta jerál/OPD, medisina interna, maternidade, operasaun, radiolojia, laboratóriu, farmásia/medikamentu, fizioterapia, no seluk tan.

Médiku espesialista iha na’in 5, médiku jerál  na’in 17, parteira na’in 15, tékniku aliadu  na’in 34, no tékniku administrasaun na’in 19.  Kada loron, ospitál  refere atende pasiente halo konsulta ema na’in 80 too  na’in 90 no atendimentu ba partu kada fulan na’in 40 too na’in 60.

Bernardino informa,  tinan ne’e pasiente ne’ebé moras no mate la too ema 20, kompara ho tinan seluk ba kotuk númeru mate bele sa’e too 40.

Bernardino esplika, problema ne’ebé ospitál sei enfrenta maka sala internamentu ki’ik no besik malu liu, seidauk iha sala VIP, no klínika laboratóriu ki’ik.

 Alende ida ne’e, ekipamentu médiku no la’ós médiku hanesan mákina radiolojia ne’ebé  apoiu husi Organizasaun Nasoins Unidas (ONU) barak tuan ona no dala ruma uza falla hela de’it.

Problema seluk tan maka, kulisaun, kama no hena barak tuan ona no presiza sosa foun, mákina destruisaun lixu médiku solidu/insineradór la funsiona dezde ospitál harii too agora.

Iha planu 2020 ba oin, sira nia parte hato’o ona proposta ba Ministériu Saúde atu aumenta ekipamentu no médiku 20, enfermeiru 40, parteira 20, médiku espesialista 8, no tékniku aliadu 40.

Alende ne’e, karreta ambulánsia iha rua de’it agora ho kondisaun ladún di’ak, tanba loro-loron halo atendimentu ba tula pasiente husi  Postu Administrativu Fatululik, Fatumean, Fohoren, Mape-Zumulai, Maukatar, Suai no Tilomar no  tula husi suku to’o  aldeia sira, inklui tula pasiente ba husi Suai ba Dili.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here