Komunidade Munisípiu Covalima partisipa konsertu muzika kalan kultrál, Kinta (27/6/2019). Imajen/GPR

COVALIMA, 28 juñu 2019 (TATOLI)-Atividade divertimentu Kalan Kulturál ne’ebé loke husi Gabinete Prezidénsia Repúblika iha Munisípiu Covalima, kinta kalan (27/6/2019), lori  ánimu no espetativa boot, katak, povu la’ós presiza de’it han, hemu no nesesidade bázika, maibé presiza mós divertimentu atu bele fó ksolok ba sira iha sira nia knua laran.

Kalan kulturál ne’ebé halo iha estrada Santa Rosa, Suai Vila, envolve grupu joven banda múzika no estudante kada eskola hodi hananu  iha ámbitu  espozisaun ai-han tradisionál.

 “Ami agradese tebes ho vizita Prezidente Repúblika, Francisco Guterres Lú Olo, mai iha Covalima  bele realiza konsertu kalan kulturál, espozisaun ai-han tradisionál, no artezanatu inklui loke filme hodi anima povu,” hateten  Simão da Costa nu’udar povu Covalima ba Ajénsia TATOLI iha ámbitu konsertu kalan kulturál.

Xefe Kaza Sivíl Prezidénsia Repúblika, Francisco de Vasconçelhos dehan, kalan-kulturál realiza hodi anima povu hodi hametin nafatin dame no kontribui ba dezenvolvimentu.

 “Kalan ida ne’e ita haksolok hamutuk, prepara atu simu na’i Prezidente  ho ita nia espíritu atu dezenvolve rai ida ne’e,”  hateten Francisco de Vasconçelhos.

Fatin hanesan, Administradór Munisípiu Covalima, Afonso Nogueira Nahak husu povu tomak partisipa iha eventu hotu estadu nian atu bele hametin liután dame hodi simu vizita PR iha Covalima.

Eventu ne’e realiza hetan apoiu seguransa husi Komandu Polisia Munisípiu Covalima inklui Unidade Polisia Fronteira (UPF) no Unidade Espesiál Polisia (UEP) ho autoridade juventude Munisípiu Covalima.

Jornalista     : Eugénio Pereira

Editór           : Francisco Simões

HAKEREK NO HATÁN

Please enter your comment!
Please enter your name here