Prezidente Parlamentu Nasionál, Arão Noe de Jesus da Costa Amaral. Imajen Tatoli/Egas Cristóvão

DILI, 28 juñu 2019 (TATOLI) –Parlamentu Nasionál (PN) hola inisiativa iha Orsamentu Jerál Estadu (OJE) 2019 hodi hatama verba ida ho osan $500,000-resin, oinsá  halo akordu ho Programa Nasoins Unidus ba Dezenvolvimentu (PNUD/ UNDP-sigla inglés) atu sai kontraktor ba peritu sira hodi prepara ezbosu lei.

Prezidente Parlamentu Nasionál, Arão Noe de Jesus Amaral informa, PNUD maka kontrata peritu sira hodi mai prepara ezbosu lei hafoin mai aprezenta iha Parlamentu Nasionál (PN) atu haree liuhusi ekipa tékniku, hanesan Ministériu Justisa, Ministériu Reforma Lejizlativa ba asuntu Parlamentár (MRLAP), Prokuradoria Jerál Repúblika, Tribunal, Defensoria Publika, Sosiedade Sivíl ho Prezidente Repúblika.

Liuhusi enkontru inaugural ba mekanizmu parlamentár ho efikásia ba ajudu ho tópiku “Harii Hamutuk” iha Ministériu Finansa, ohin, Prezidente Parlamentu Nasionál, Arão Noe de Jesus Amaral, esklarese katak, mandatu lejizlativa dalima hatama ona programa ida kona-ba reforma lejizlativa iha setór justisa liuliu iha area lejizlasaun sira tanba kompeténsia parlamentu nian maka halo lei.

Nia tenik, PN hahú iha 2017 to’o 2023, aprova ona hodi fó dalan oinsá maka unifika apoiu sira ne’ebé mai husi nasaun doadór sira tenke liuhosi PNUD atu bele organiza di’ak, nune’e ajuda labele sobre poen ba malu.

“Doadór sira ne’ebé hakarak ajuda parlamentu tenke liuhusi PNUD atu labele iha sobre poen ba malu,”  tenik Arão Noe.

Tuir Arão Noe, justisa ne’e interese nasionál, tanba ne’e, tenke konsentra hodi halo reforma, maibé tenke mós liuhusi konsultasaun tanba ema bele kontesta enkuantu la liuhusi prosesu ida.

Nia akresenta katak, kuandu justisa ida di’ak tenke iha lejizlasaun ida forte atu bele garante setór justisa iha Timor-Leste.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here