Taballadór timoroan sira ne'ebé tuir formasaun lian Ingles ba Traballadór Sazonal Austalia nian. Imajen/SEFOPE

DILI, 28 Juñu 2019 (TATOLI)–Diresaun Jerál Formasaun Profisionál no Empregu (DJFPE-SEFOPE) loke sesaun edukasaun no informasaun iha Sentru Formasaun SENAI Becora, Dili, relasiona ho oportunidade servisu ba programa Pacific Labour Scheme (PLS) ba timoroan hamutuk 1.000.

Diretór Nasionál Empregu, Lucio Bere Tasi dos Santos esplika,  PLS  hanesan programa foun ida, nune’e, ohin, hahú abertura ba formasaun jerál ba joven sira ne’ebé hakarak partisipa iha programa refere.

PLS nia MoU (memorandu of understanding) asina ona iha  Marsu ho Abril, foin lalais ne’e. ohin, hahú implementasaun ho formasaun ba ema hamutuk 1.000 ho nia rekizitu ne’ebé  sira presiza prienxe.

Lucio Bere Tasi dos Santos  hateten, rekizitu ba PLS  diferente ho Seasonal Worker tanba presiza valor husi IELST tenke 5.5 no presiza ema ne’ebé ho kualifikasaun as nune’e mós abilidade  ne’ebé di’ak.

“Ohin ne’e hanesan preparasaun, bainhira sira tuir teste ona hatama sira nia lista ba baze de dadus hafoin liu husi PMU bele oferese ba adidu timor nian iha Australia hodi bele oferese ba kompañia, nune’e kompañia sira ne’ebé interese bele manda lista naran mai maka haruka sira,” hateten  Lucio dos Santos.

Ba tinan ida ne’e, Sekretária Estadu Formasaun Profisionál no Empregu (SEFOPE) nia tarjetu sei haruka traballadór sira hamutuk 1.500, maibé ba sesaun ida agora bele iha de’it na’in 500 ou na’in 1.000 depende ba teste.

 “Agora tama ona  Jullu tempu badak, ita nia espetativa mós karik la boot, maibé primeiru saida maka ita halo ne’e, fó korajen ba kolega sira ne’ebé maka liu, atu  ba servisu ho attitude ne’ebé di’ak para bele manan governu Australia ho nia empregadór sira nia laran, hodi nune’e tinan oin mai sira bele simu joven timor barak liu tan,” tenik Lucio.

Formasaun PLS ne’e prepara joven timoroan sira ba servisu iha Australia iha área ospitalidade, agrikultura no indústria.

Nia garante katak, programa ne’e benefisia tebes ba hotu-hotu no mós ba nasaun Timor-Leste rasik atu ajuda atinje meta polítika estadu nian redús númeru dezempregu.

“Ita nia rai laran indústria menus tebes, ita foin iha maka Heineken ho Timor Cement de’it. Benefísiu seluk husi programa PLS ne’e maka aumenta traballadór sira nia koñesimentu iha area saida de’it sira hodi prepara an ba merkadu traballu.

Jornalista     : Nelia Rosario

Editór           : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here