Aprezentasaun Sistema Integradu Ba Jestaun Estrada iha Otél Novo Turismo. Imajen Tatoli/ Julia Chatarina

DILI, 27 juñu 2019 (TATOLI)Ministériu Obra Públika (MOP) kontratu ona parseiru dezenvolvimentu internasionál Catalpa atu kria Sistema Integradu Ba Jestaun Estrada ka IRMIS (Integrated Roads Management Information Systems).

Liuhosi worksop ne’ebé organiza hosi MOP liuhosi Diresaun Nasionál Estrada, Ponte no Kontrolu Cheia (DNEPCC-sigla portugés) durante loron 27 no 28 juñu, ekipa tékniku sira fahe informasaun kona-ba sistema informasaun, nune’e bele fasilita serbisu MOP bainhira implementa ona sistema ne’e.

Diretor Jerál Ministériu Obra Públika, Rui Hernâni hateten MOP inísia ona kontratu ho empreza Catalpa hodi kria sistema ba Diresaun Nasionál Estrada, Ponte no Kontrolu Cheia, nune’e bele hahú serbisu ho sistema.

“Atu halo iha área rurál no munisípiu sira ho planu integradu ne’ebé efetivu ba klase estrada no ponte sira hotu iha estrutura kontrola Cheias, tanba MOP hanesan ministériu ne’ebé asumi responsabilidade atu haree estrada sira,” nia tenik ba jornalista sira iha Otél Novo Turismo, kinta (27/6).

Nia esplika, sistema ne’e rasik hanesan sistema prinsipál atu fasilita planu integradu ba orsamentu, kontratu no jestaun bainhira halo projetu.

Rui informa, empreza Catalpa sei kria baze dadus ba estrada hotu iha territóriu tomak, tanba sistema ne’e involve programasaun, jestaun, planifikasaun, ezekusaun no manutensaun.

Diretór ne’e hatutan, MOP liuhosi Diresaun Jérál mak sei halo kontratu hodi Catalpa bele kria sistema ne’e.

Entretantu, dezenvolvimentu IRMIS ne’e hetan ona fundu hosi Governu Austrália liuhusi Department Foreign Affairs and Trade (DFAT), hosi programa apoiu Estrada Rurál Ba Dezenvolvimentu (R4D).

Konsultória estrada hosi Catalpa hetan ona selesaun liuhusi konkursu internasionál, atu dezenvolve sistema ne’e iha fulan 12 nia laran, inklui halo formasaun ba funsiunáriu MOP no funsionáriu sira iha munisípiu sira kona-ba utilizasaun ba sistema ne’e.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here