Sekretáriu Estadu Kooperativa, Arsénio Pereira da Silva. Foto/SEDK.

DILI, 27 juñu 2019 (TATOLI)Sekretáriu Estadu Kooperativa (SECoop-sigla portugés), Arsénio Pereira da Silva, identifika kooperativa kréditu balun falla iha jestaun no la fiar malu.

Eis Diretór FONGTIL ne’e haktuir, dezde uluk to’o agora kooperativa sira ne’ebé rejistu ne’e hamutuk 195 maibé la la’o di’ak. Iha kooperativa hamutuk 39 de’it mak la’o di’ak.

“Sira (kooperativa kréditu) fó informasaun lubuk ida, liliu sira dehan katak ami presiza aumenta tan kapasidade. Entaun, sira ne’ebé la susesu ne’e tanba problema iha jestaun. Sira mós la fiar malu, entaun sira fahe-malu tiha,” nia dehan iha Sentru Konvensaun Dili (CCD-sigla portugés), kinta (27/6).

“Balun dehan sira prodúz maibé merkadu laiha, entaun ami halo kedas ho ami-nia estratéjia, liliu ami halo estratéjia katak iha kada postu ida ba oin ne’e ami sei halo sentru kooperativa integradu ida para fasilita no kanaliza produtu lokál sira bele ba direta ba konsumidór sira ka ba iha merkadu,” nia salienta.

Arsénio esplika, ezisténsia kooperativa sira tuir estatutu katak governu hanesan reguladór no tenke desidi liuhosi asembleia anuál no asembleia jerál ne’e mak desidi karik kontinua, hadi’a iha parte ne’ebé no se fahe-malu tenke iha akta disolve kooperativa ne’e.

Nia fó ezemplu, grupu ne’ebé susesu mak kooperativu kréditu iha Oé-Cusse naran Enklave, Lanamona iha Maliana no iha Dili Klibur Uniaun Ba Kréditu.

“Kooperativa Kréditu Enklave iha Oé-Cusse, fó impréstimu ba nia membru rihun $50, ninia kapitál ne’e milliaun-ida resin,” nia katak.

Ho problema sira ne’e hotu, Sekretáriu Estadu Kooperativa ne’e sei halo mudansa liliu kresimentu ekonomia uma-kain hodi halo mobiliza kooperativa iha área rurál bele moris intermu fasilita, regulariza no fó apoia hodi bele partisipa dezenvolvimentu.

Jornalista: Evaristo Soares Martins

Editór: Xisto Freita

HAKEREK NO HATÁN

Please enter your comment!
Please enter your name here