Embaixadór Japan iha Timor-Leste, Hiroshi Minami, Imajen/Egas Cristovão

DILI, 27 juñu 2019 (TATOLI)- Japaun Overseas Cooperation Volunteers (JOCVs) liuhusi JICA (Ajénsia Kooperasaun Internasionál Japaun-sigla inglés) halo aprezentasaun kona-ba atividade voluntária sira ne’ebe mak dinamiza iha komunidade lokál sira iha área oioin hodi kontribui ba dezenvolvimentu Timor-Leste (TL).

Embaixadór Japaun ba TL, Hiroshi Minami hateten katak JOCVs hahú iha Timor-Leste iha 2010 no nia kontente rona atividade husi voluntariu JICA sira, ne’ebe dinamiza ona iha komunidade sira iha área oioin hanesan dezenvolvimentu komunidade, edukasaun fízika, nutrisaun, saúde públika, treinu vokasionál no seluk tan ne’ebé maka hala’o iha Dili, Aileu, Ermera, Maubise, Liquiça, Venilale (Baucau), Maliana no Atauro.

“Tanba ne’e, ha’u fiar katak voluntáriu JICA sira iha kna’ar importante ba dezenvolvimentu iha Timor-Leste. Ha’u mós espera katak sira kontinua halo kooperasaun ho komunidade lokál no orgnizasaun sira atu kontribui ba dezenvolvimentu iha Timor-Leste,” hateten Embaixadór Japaun Hiroshi Minami ba jornalista sira iha nia kna’ar fatin Embaixada Japaun kinta (27/06).

Embaixadór Hiroshi Minami relata mós katak iha tinan ida ne’e, voluntariu hamutuk 31 maka iha Timor-Leste nune’e iha fulan jullu sei aumenta tan voluntáriu foun na’in hitu.

“Liuhusi oportunidade ne’e, ha’u hakarak hato’o ha’u-nia agradese ba instituisaun sira hanesan ospitál, eskola no parte sira ne’ebé simu ona atu kopera ho voluntáriu JICA sira. Ha’u espera atu organizasaun sira bele kontinua hala’o kooperasaun di’ak liu ho voluntáriu sira,” espera Embaixador Hiroshi Minami.

Iha biban ne’e, diplomata japonés ne’e haktuir, iha pasadu, voluntáriu sira hakerek livru kona-ba lian Tetum ne’ebé di’ak ba japonés sira atu aprende lian tetum no livru sira ne’e sira hakerek no produz kada tinan.  “Husi Livru sira ne’ebé prodús iha ida hanaran’Hadomi no Dame’ tanba sira dezeju sinseramente domin no dame iha sosiedade no povu Timor-Leste”.

Iha tinan ne’e, JOCVs kompleta tinan 10 iha Timor-Leste. Husi 2010 to’o 2019, JICA haruka ona voluntáriu sira hamutuk ema na’in 100.

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here