Jerente na’in 35 hosi Kooperativa Kréditu 21 tuir formasaun kona-ba jestaun no dezenvolvimentu profisionál, ne’ebé organiza hosi Federasaun Kooperativa Kréditu Hanai Malu (FCCHM-sigla portugés). Imajen espesiál

DILI, 28 juñu 2019 (TATOLI)—Jerente na’in 35 hosi Kooperativa Kréditu 21 tuir formasaun kona-ba jestaun no dezenvolvimentu profisionál.

Formasaun ne’e hahú hosi sesta (28-30/6/2019). Formadór mai hosi Association of Asian Confederation of Credit Unioins (ACCU) hosi Jakarta-Indonézia, Estefanus Togah. Formasaun refere organiza hosi Federasaun Kooperativa Kréditu Hanai Malu (FCCHM-sigla portugés).

Objetivu hosi formasaun durante loron rua ne’e atu hasa’e koñesimentu jerente grupu kooperativa kréditu iha área jestaun ba grupu oinsá dezenvolve di’ak liu-tan grupu.

Grupu Kooperativa 21 mak hanesan Lanamona hosi Maliana, Lemorai hosi Dili, Ira-Luka hosi Viqueque, Moris Foun Quelicai, Moris Hamutuk (Dili), Klibur Uniaun Ba Kréditu (Dili), Dadira (Dili), Enklave (Oé-Cusse),  CMS-IAFE (Dili), CUAS (Lospalos), Same Boventura, Esperansa (Dili), Moris Foun Fuiluro (Lospalos), Hadiaras (Viqueque), Falira (Dili), Fini Sorumutu (Dili), Domin Huhun (Manatuto), Bie Ki Sahe (Baucau), IHC Vemasse, Kaibada (Baucau) no Radifu (Ainaro).

Iha abertura ba formasaun ne’e, marka prezensa hosi Sekretáriu Estadu Kooperativa, Arsénio Pereira, Prezidente Konsellu Administrasaun Banku Nasionál Komérsiu Timor-Leste (BNCTL-sigla portugés), Brigídio de Sousa no Prezidente Federasaun Kooperativa Kréditu Hanai Malu (FCCHM), Elizário Ferreira.

Hosi kooperativa kréditu 21, jerente no nível diretór hamutuk tolu nulu resin-lima (35) mak partisipa iha formasaun kona-ba dezenvolvimentu profisionál iha jestaun kooperativa kréditu nian, nune’e fila-fali ba sira-nia munisípiu jere didi’ak sira-nia kooperativa.

Sekretáriu Estadu Kooperativa (SECoop-sigla portugés), Arsénio Pereira, hateten formasaun ne’e importante, tanba kooperativa barak mak la la’o, entaun ho formasaun ne’e bele halo jestaun didi’ak ba sira-nia grupu.

“Ha’u mai hanesan atu motiva no fó hanoin ba sira nune’e dezenvolvimentu kooperativa iha ita-nia rai ne’e bele la’o ho di’ak, tanba kooperativa kréditu ne’e bele fó impréstimu ba sira-nia membru to’o rihun $50, balun to’o rihun $100, entaun ho formasaun ne’e bele dezenvolve liu-tan sira-nia esperiénsia hodi kontinua jere ho di’ak,” nia ko’alia iha edifísiu Federasaun Kooperativa Kréditu Hanai Malu, Bairru-Pité, Dili, ohin.

Nia dehan, governu iha kompromisu apoia kooperativa kréditu ne’ebé la’o iha rai laran , la’ós de’it apoia finanseira, maibé apoia morál ba kooperativa sira.

“Iha setór kooperativa ne’e importante mak fiar-malu, serbisu hamutuk no fó solidariedade ba malu,” Arsénio esplika.

Iha fain hanesan, Prezidente Konsellu Administrasaun Banku Nasionál Komérsiu Timor-Leste (BNCTL-sigla portugés), Brigídio de Sousa, hateten presiza iha kooperasaun ho kooperativa sira hodi apoia malu iha kréditu, tanba BNCTL mesak sei la rezolve buat hotu, liliu atendementu públiku ne’e.

Prezensa Prezidente Konsellu Administrasaun BNCTL iha abertura ba formasaun ne’e atu esplora métodu no maneira kooperasaun ho Federasaun Hanai Malu, liliu ba kooperativa kréditu sira.

“Ita hotu hatene katak BNCTL nia prezensa iha munisípiu sira, maski ami iha banka móvel maibé ladún uza ho másimu, maibé iha kooperativa sira, uniaun kréditu sira-nia prezensa to’o iha área remota. Sira mak besik liu komunidade sira, entaun parte rua hanoin katak nusá mak ita la serbisu hamutuk,” Brigídio subliña.

Nia dehan, posibilidade BNCTL ho FCCHM serbisu hamutuk no federasaun mak jere hodi fó fali kréditu ba grupu kooperativa sira, nune’e grupu kooperativa sira bele dezenvolve setór produtivu sira hanesan agrikultura no peska.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here