Primeiru-Ministru, Taur Matan Ruak. Imajen Tatoli/Egas Cristóvão

DILI, 27 juñu 2019 (TATOLI) – Setór Agrikultura nu’udar setór produtivu, tanba ne’e Governu iha hanoin atu subsidia transporte iha setór ne’e atu bele estabiliza presu iha merkadu, aumenta konsumu no produtividade.

Primeiru-Ministru (PM), Taur Matan Ruak hateten, setór agrikultura iha país balun subsidia produsaun no iha tempu hanesan subsidia mós transporte, maibé iha Timor-Leate subsidia de’it produsaun.

“Iha Amérika produsaun la-subsidia. Fila rai no kuda ne’e agrikultór sira mak halo mas transporte produtu ba merkadu ne’e Estadu subsidia. Ita hakarak halo buat rua dala ida,  subsidia produsaun no subsidia transporte ho objetivu estabiliza presu”, tenik PM Taur iha Jornada Orsamentál ho tema “Promove Kualidade Planeamentu no Orsamentu Hodi Hametin Prestasaun Servisu”, ne’ebé realiza iha Salaun Ministériu Finansa, kinta ne’e

Tuir Xefe Governu, subsidia transporte signifika produtu ne’ebé agrikultór sira produs bele mai diretamente merkadu ho presu razoavel iha bolsu ho objetivu estabiliza presu, aumenta konsumu no aumenta produtivudade.

Nune’e mós nia dehan, lakohi hare Ministériu Agrikultura no Peska (MAP) jere tratór no tinan oin tenke halo leilaun.

“Tratór sira taka deit ho terpal la halo buat ida, tinan ida ne’e tenke leilaun hotu. Tinan oin hau lakohi hare tan tratór. Fó ba setór privadu, sira fila rai mak ita selu”, nia akresenta.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here