Sekretáriu Estadu Kooperativa, Arsenio Pereira da Silva. Imajen TATOLI/Egas Cristovão

DILI, 27 juñu 2019 (TATOLI)Sekretáriu Estadu Kooperativa (SECoop-sigla portugés), Arsénio Pereira, konvida funsionáriu públiku sira atu harii kooperativa kréditu.

“Iha biban ne’e, ha’u konvida instituisaun hotu-hotu, karik kada instituisaun bele harii kooperativa liliu funsionáriu sira,” governante ne’e ko’alia iha Sentru Konvensaun Dili (CCD-sigla portugés), kinta (27/6).

Tanba ne’e, nia haktuir, hosi parte Gabinete SECoop nian oras ne’e harii ona kooperativa, nune’e funsionáriu públiku sira bele ajuda malu liuhosi impréstimu.

“Ita hatene katak ita-nia funsionáriu sira-nia saláriu ne’e la to’o. Tan ne’e, tau osan uituan-uituan hamutuk iha kooperativa, sira bele halo impréstimu no aban bainrua fó fila-fali ho funan. Funan ne’e mós sei fila-fali ba na’in sira,” Arsénio haklaken.

Nia esplika, tuir dekretu lei, atu harii ne’e Sekretaria Estadu Kooperativa tenke halo sensibilizasaun hafoin hakat ba pra-kooperativa, tanba atu sai kooperativa ne’e tenke liuhosi asembleia hodi defini estrutura kooperativa ne’e.

Governante ne’e informa, bainhira kooperativa ne’e la’o di’ak, membru sira bele halo impréstimu depois halo fali buat seluk—balun hakiak animál, kuda modo hodi ba fa’an, balun fila-liman no balun haruka oan sira ba eskola.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here