Lider Istoriku, Kay Rala Xanana Gusmão, Francisco Guterres Lú Olo ho Mari Alkatiri. Imajen/Eugénio Pereira

COVALIMA, 28 juñu 2019 (TATOLI)– Veteranu Rezisténsia  Munisípiu Covalima husu ba  foin sa’e sira ne’ebé envolve-an iha partidu polítiku atu la bele soran no fahe unidade lider istóriku sira, hanesan Kay Rala Xanana Gusmão, Taur Matan Ruak,  Francisco Guterres Lú Olo, ho Mari Alkatiri.

Liuhusi diálogu  aberta povu Covalima ho Prezidente Repúblika, Francisco Guterres Lú Olo,   ohin, iha salaun enkontru Feto Sant Rosa, Munisípiu Covalima, veteranu Osório ‘Mausoco’ , espresa nia lamentasaun kona-ba atitude foin sa’e balun nian ne’ebé halo diskursu ódiu iha rede sosiál   Facebook hodi hatete at lider istóriku balun no inventa informasaun mesak ‘vingativu’ hasoru lider istóriku sira.

 “Ami preokupa tebes ita nia joven sira liu –liu iha Parlamentu Nasionál, labele selok malu too insulta ita nia lidera sira, imi labele halo hanesan ne’e, tanba iha tempu rezisténsia ami veteranu sira ne’e maka subar Maun Xanana, Maun Taur Matan Ruak, Maun Lú Olo no ita nia lider sira seluk,” afirma Osório ‘Mausoco’.

Veteranu ne’e husu atu lider polítiku sira hanesan, Xanana Gusmão, Taur Matan Ruak, Francisco Guterres Lú Olo ho Mari Alkatiri no lider sira seluk atu hatudu ezemplu  unidade ba foin sa’e sira hodi eduka sira no prepara joven sira sai polítiku ne’ebé maduru.

Biban ne’e, Prezidente Repúblika, Francisco Guterres Lú Olo dehan, tempu ona atu lider sira serbisu hamutuk hodi kria planu integradu ne’ebé bele halibur ideia matenek hodi buka rezolve problema nasaun no lori povu sai husi mukit.

“Ami nu’udar lider polítiku iha responsabilidade boot atu halo polítika di’ak rezolve ita nia nasaun. Ita nia povu nia problema sai hanesa serbisu boot ida ne’ebé ita maka tenke hamutuk atu halo ba povu nia moris di’ak,” afirma PR Lú Olo.

Lú Olo haktuir, kompromisu iha luta ba rezisténsia maka atu hadi’a povu nia moris, kompromisu ida ne’e lider polítiku hotu- hotu tula iha sira nia kabas hanesan todan boot ba konfiansa ne’ebé povu fó ba sira liu husi festa demokrasia eleisaun jerál kada tinan liman hodi hili partidu ida kaer ukun no lider uza oportunidade ukun atu haree no hadi’a povu nia moris.

Xefe Estadu  mós husu ba veteranu sira labele fahe malu tanba de’it kór polítika no hadau malu projetu eletrisidade hodi halo povu sira sofre moris iha nakukun nia laran.

PR Lú Olo hatene iha Covalima, veteranu balun tanba  de’it hadau malu projetu, sira husik hela sira nia responsabilidade morál nu’udar luta atu tau matan ba problema sosiál ne’ebé povu sira hasoru iha área edukasaun, saúde, bee moos, estrada aat, no eletrisidade ne’ebé seidauk dada hodi lakan iha povu nia uma.

Jornalista      : Eugénio Pereira

Editór            : Francisco Simões

 

HAKEREK NO HATÁN

Please enter your comment!
Please enter your name here