Imajen atleta sira hosi Timor-Leste liuhusi CONTL nia mahon tuir eventu internasionál iha rai li’ur. Foto espesiál

DILI, 28 juñu 2019 (TATOLI)Reprezentante VIII Governu Konstitusionál atuál Sekretáriu Estadu Kooperativa, Arsénio Pereira, hateten desportu iha rai laran hahú buras, tanba ne’e presiza dezenvolve liu-tan.

“Ita selebra Loron Olímpiku ne’e ho fun run. Ita mós iha rai laran modalidade desportiva hahú buras, tanba ne’e presiza dezenvolve-aan liu-tan, maibé presiza iha apoia ne’ebé másimu,” Arsénio dehan liuhusi ninia deskursu iha komemorasaun Loron Olímpiku iha Jináziu, Dili, ohin.

Nia informa, kurrida divertida ne’e bele haforsa saúde no governante ne’e mós orgullu ho federasaun ka modalidade oioin iha rai-laran.

Iha biban hanesan, Vise Prezidente Komité Olímpiku Nasionál Timor-Leste (CONTL-sigla portugés), Mateus da Cruz, informa selebrasaun ba Loron Olímpiku ne’e gasta orsamentu rihun $7.

“Eventu ne’e hetan apoiu hosi kompañia balun ho ákua no Telkomcel mós apoiu. Atividade ne’e hetan animasaun hosi estudante sira hodi haburas liu-tan ita-nia desportu,” tenik Mateus.

Loloos ne’e, nia esplika, komemorasaun Loron Olímpiku ne’e selebra iha 23 juñu liu-ba, maibé adia ba 28 fulan juñu tinan ida ne’e. Selebrasaun Olimipic Day (Loron Olímpiku) ne’e ho tema “Unidade no Transformasaun Liuhosi Desportu”.

Selebrasaun loron olímpiku ne’e la’o-ain hahú hosi tuku 07.00 hosi Jináziu Dili liuhosi Kolmera, Bebora, Mandarin, Palpaso ba dirasaun Komisaun Antí Korrupsaun, Motael, Pálasiu Governu no ikus konsentra iha Jináziu Dili.

Partisipa iha fun run (kurrida divertida) ne’e hosi funsionáriu públiku, estudante, joven sira, membru PNTL no PNTL balun, Komité Paralímpiku Nasionál Timor Leste (CPNTL-sigla portugés).

Iha selebrasaun ne’e mós hatudu atrasaun hosi Federasaun Taekwondo, Karatedo, Silat no modalidade sira seluk.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here