Anastásio da Costa

DILI, 28 juñu 2019 (TATOLI)Wainhira ha’u tuir eventu, iha preparasaun  antes loron ida ne’e, ha’u hanesan mate. Ema ne’ebe la’ós atleta, labele sente buat ne’ebé ha’u sente.

Problema kona-ba oinsá bele forma ema ida-nia isin sai body building loloos, ne’e sai hanesan hahán ba treinadór iha Strong Gym ne’e. Problema atu forma ema sai saudável no sai atleta body building loloos, ne’e la’ós buat foun ba atleta ne’ebé uluk hasai nia lisensiatura iha Institut Teknologi Nasional (ITN) Malang-Indonézia iha Departamentu Tékniku Enjeñaria hosi Fakuldade Indústria ne’e.

Problema atu sai kampiaun ba kompetisaun body building ne’e, imi bele ba husu no konsulta ho Fataluku oan ne’ebé moris iha Serelau, Lospalos, Lautém, loron 26 fulan setembru tinan 1985 ne’e. Problema kona-ba segredu atu sai kampiaun, hakbesik-án ba atleta timoroan ne’ebé tuir eventu kompetisaun “Body Contest L. Men” iha Malang-Indonézia (2012) ne’ebé hetan nominasaun sai “The best six pack” ne’e.

Anastásio da Costa

Atu sai kampiaun ka lae, ne’e la’ós problema. Ida ne’ebé sai problema boot mak oinsá atleta ida bele hatudu performa di’ak iha palku ida-nia leten atu hatudu sira-nia “koreo” ne’ebé bele atrai no diverte ema. Tanba, sai atleta tenke esforsu no istika-án atu ninia múskulu bele tebe-sai no hatuur-án hanesan fatuk-mutin mota nian be belit iha sira-nia isin-lolon—furak iha matan no kmanek sai ema ne’ebé saudável.

“Klaru ita tenke istika ita-nia isin no tahan ita-nia iis para hasa’e ita-nia múskulu. Depende ba ita-nia kontrola iis. Hakarak hamriik mak kontrola iis ka wainhira ita kontrola iis kuandu ita halo hela koreo ho entertein para juri labele deskonfia katak ita-nia iis la to’o,” dehan treinadór no atleta Body Building, Anastásio da Costa, ba Agência TATOLI iha Strong Gym, Dili, sesta (28/6/2019), hodi hatudu nia hamnasa-mihis.

Atu sai kampiaun ne’e hanesan luta ida ne’ebé hamriik iha entre mate no moris nia leet. Mate tanba atleta ida tenke prepara-án mate-án hodi halo tuir regra ne’ebé iha. Moris tanba wanhira hamriik ona iha palku leten atu hatudu-án, atleta ne’e tenke esforsu-án hodi aprezenta buat ne’ebé di’ak liu tuir ema barak nia espetativa, ne’ebé dala barak halo atleta refere lakon iis no lakon lian hafoin tuun hosi palku leten.

Anastásio da Costa

“Loos. Ita tenke prepara di’ak no halo tuir duni nia regra. Wainhira eventu foin hotu mak ita atu ko’alia, ita nia lian ne’e la normál ka la hanesan ema baibain ko’alia. Tanba ida ne’e, luta ida entre atu mate ka atu moris. Wainhira ha’u tuir eventu ida, ha’u kuandu prepara antes loron ida ne’e, ha’u hanesan mate. Tanba ha’u tenke kontrola no bandu buat hotu ba ha’u-nia án. Ema ne’ebé la’ós atleta labele sente buat ne’ebé ha’u sente,” nia dehan hodi homan-liman no hateke ba ema sira ne’ebé treinu hela iha jináziu laran ne’e.

Hakarak atu sai kampiaun, xave lalehan ba kampiaun ne’e ida de’it. Tenke disiplina, iha vontade no esforsu-án treinu tuir planu treinu nian no alimentasaun ne’ebé di’ak no esforsu-án nafatin ba nafatin. Iha xave importante hirak ne’e mak iha eventu kompetisaun Body Building 2019 ne’ebé hala’o iha Timor Plaza, Dili, Anastásio da Costa, sai kampiaun ba body building hosi partisipante ema 72 ne’ebé reprezenta hosi Gym 16 ne’ebé eziste iha Dili, Timor-Leste.

“Iha kompetisaun body building ne’ebé realiza iha 22 juñu 2019 ne’e, ha’u hetan primeiru lugár. Ha’u sai kampiaun la’ós tanba tuur de’it hafoin hetan kampiuan maibé ha’u esforsu no prepara-án kuaze fulan tolu nia laran. Ha’u prepara orsamentu rasik hodi  hola suplementasaun, hahán, mak ha’u foin bele halo ezersísiu. Iha ezersísiu, ha’u tenke han di’ak no konsumu multivitamina ne’ebé bele rekopera ha’u-nia múskulu para nia labele monu. Nia rezultadu mak ha’u sai primeiru lugár ne’e,” nia dehan ho oin-midar.

Só, maski Timor-Leste (TL) rasik seidauk prodúz suplementasaun maibé nia uza suplementasaun ne’ebé prodúz iha Amérika ne’ebé nia bele asesu liuhusi ninia belun sira iha Indonézia. Kona-ba hahán, babain nia haree ka konsumu liu-ba hahán ekstra-proteina hanesan na’an, ikan, manu-tolun no repollu funan. Hahan hirak ne’e mak bele apoiu ninia múskulu ne’e bele tebe-sai no hatuur-án ho di’ak.

Oinsá mak ita-boot haree ba ita-boot nia isin be di’ak liu ema hotu, nia hatán, nia rasik sei presiza apriende barak tanba maski iha Timor nia sai kampiaun hela de’it maibé iha oportunidade nia ba tuir eventu internasionál, nia seidauk sai the best iha nível internasionál. Se hakarak sai the best iha nível internasionál, nia husu, presiza apoiu hosi governu para nia bele reprezenta Timor-Leste bele halo buat ruma iha mundu.

“Komesa hosi tinan 2010, ha’u tuir eventu to’o agora. Ha’u tuir ona eventu hamutuk 78 iha eventu nasionál no internasionál. Eventu internasionál ne’ebé organiza hosi Sekretaria Estadu Juventude no Desportu (SEJD), ha’u tuir iha Thailándia no Xina. Iha Thailándia (2016), ha’u hetan pozisaun ba dala-6 no iha eventu International Federatiom Body Building (IFBB) iha Xina (2018), ha’u hetan pozisaun ba dala-7. Ne’e tanba ha’u-nia preparasaun mak menus,” Anastásio hateten.

Iha eventu nasionál, nia haktuir, hosi tinan 2013 nia tuir kompetisaun to’o iha ohin loron (2019), nia sempre hetan primeiru lugár beibeik. Eseptu, iha tinan 2017 mak nia foin hetan segundu lugár.  Maibé, restu ne’e nia sempre hetan primeiru lugár. Ikus liu, iha 22 juñu 2019, nia hetan tan primeiru lugár iha Kompetisaun Strong Gym nia aniversáriu ba dahuluk ne’ebé organiza hosi Mister Body Building Timor-Leste. Iha kampionatu ne’e, nia simu trofi ida ho osan montante $400.

Tuir atleta ne’ebé sempre hala’o nia moris loro-loron ne’e ho lema “Ha’u-nia saúde no ha’u-nia amizade ba ha’u-nia juventude” ne’e, baibain kaer metin xave moris ida-ne’e hodi hatoman-án ho disiplina. Tanba liuhusi disiplina, vontade no esforsu mak nia bele hetan buat ne’ebé nia hakarak no mehi ba ne’e. Mehi hirak ne’e, tuir nia, la sees hosi família ninia apoiu tanba esforsu ne’e bele hetan susesu liuhusi família ida-nia domin be moos no kle’an.

Ba família nia armonizasauna no hakmatek, oras ne’e, nia halo kna’ar nu’udar treinadór iha Strong Gym hodi fasilita timoroan sira sai saudável no forte. Nu’udar treinadór, nia badinas fahe nia matenek no koñesimentu ba ema seluk. Maibé, buat ne’ebé nia hakarak, doit-metan (saláriu) ne’ebé iha nia liman tenke tuir ninia profisionalidade. Maibé, se na’in ba Strong Gym la haree ba asuntu ida ne’e, nia sei desidi hodi buka fali fatin seluk iha tempu badak ne’e. Tanba, treinadór ne’e profisaun, entaun tenke simu tuir ninia profisionalidade.

Entretantu, ba timoroan sira ne’ebé hakarak sai body building ne’ebé di’ak, nia tatoli ba timoroan sira tenke badinas treinu, disiplina no sempre iha vontade hodi duni tuir nafatin imi-nia mehi sai body building loloos. Nia mós hato’o mensajen liliu ba na’in ulun sira, espesialmente ba ministériu ne’ebé kompetente no ba iha Federasaun Body Building halo oinsá para ita-nia atleta timoroan sira ne’e labele abandonadu.

“Governu tenke valoriza atleta sira ne’ebé iha prestasaun di’ak para sira bele tau-matan fali ba  atleta maluk ne’ebé laduun iha koñesimentu ba treinamentu. Governu tenke halo eventu nasionál iha rai laran ka eventu internasionál, atu nune’e atleta timoroan sira iha motivasaun para sira bele hadi’a sira-nia án liuhusi desportu liliu ba body building,” nia tatoli ho fuan ho laran tomak.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here