Diretór Nasionál CNFEP Tibar, Simão Tito Barreto. Imajen Tatoli/Egas Cristóvão

DILI, 26 juñu 2019 (TATOLI)—Diretór Sentru Nasionál Empregu no Formasaun (CNEFP-sigla portugés), Simão Tito Barreto, hateten CNEFP sei prepara joven feto sira hodi lori ekipamentu pezadu iha futuru.

Nia haktuir, oras ne’e  Sentru Formasaun Tibar serbisu hamutuk ho Institutu Jestaun Ekipamentu (IJE) hodi fornese ekipamentu pezadu sira ba partisipante sira prátika.

Diretór CNEFP hateten, faze dahuluk kursu iha ekipamentu pezadu maioria mane, maibé etapa daruak sei forma feto sira iha kursu refere.

“Ekipamentu balun iha ona fatin formasaun hanesan eskavadór, loder, silindru no kamioneta. Entaun, ita hein prosesu segundu grupu ne’e mak ita forma feto hodi bele lori ekipamentu pezadu sira iha futuru,” nia dehan ba Agência TATOLI, iha edifísiu Ministériu Ensiñu Superiór, Siénsia no Kultura (MESSK), Kolmera, Dili, kuarta (26/6).

Nia informa kooperasaun ho Institutu Politékniku Betano (IPB)-Kay Rala Xanana Gusmão, posibilidade estudante feto hosi institutu refere bele hola parte kursu daruak ba ekipamentu pezadu ne’e.

“Ita haree katak matéria kaer ekipamentu pezadu ne’e só ba ema mane. Ita hakarak koko iha Tibar, estudante feto atu primeiru grupu ba kursu iha ekipamentu pezadu atu lori pezadu sira. IPB iha kandidatu estudante feto sira, ita lori ba formasaun depois hetan lisensa ba operasaun ekipamentu pezadu ne’e rasik,” Simão tenik.

Estudante hosi IPB hamutuk 37 hosi konstrusaun sivíl sei halo prátika iha CNEFP tuir akordu ne’ebé iha ona.

Espesialidade ne’ebé aplika iha CNEFP Tibar mak hanesan kontrusaun jerál, eletrisidade, kanalizasaun karpintária, pedreiru, soldadora, agrikultura, ospitalidade, marítima, jestaun ba portu, enérjia solár, instalasaun operasaun bomba elétrika no elétrika instrumentasaun ba mina no gás. Kursu iha área hirak ne’e normálmente durante fulan-neen (6).

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here