Ministra Finansa ein ezersísiu, Sara Lobo Brites,Imajen/Egas Cristovão

DILI, 27 juñu 2019 (TATOLI) – Iha abertura sesaun traballu Jornada Orsamentál, Ministra Finansa ein ezersísiu, Sara Lobo Brites fó hanoin ba instituisaun estadu sira katak orsamentu ne’ebé di’ak presiza ekilíbriu.

“Presiza ekuilíbriu iha distribuisaun orsamentu atu bele reduz dezigualdade sira iha ita-nia sosiedade nia leet,” tenik governante ne’e iha Salaun Ministériu Finansa, kinta ne’e.

Hodi dehan, dezafiu boot ne’ebé Timor-Leste sei hasoru mak taxa pobreza 40,7% iha populasaun, maibé persentajen ne’e seidauk konta ho situasaun balun ne’ebé akontese bainhira dezastre naturál akontese iha bai-loron naruk no afeta ba produsaun agríkola, hanesan fatór seluk ne’ebé kontribui ba ema atu sai ki’ak liután.

“Iha situasaun ida ema balun iha kbiit no seluk laiha kbiit no deziguldade iha klase atendimentu iha sosiedade nia laran entre área urbana no rurál,  entre munisípiu, no mós suku,” nia dehan tan.

Nune’e mós governante ne’e konsidera, Timor-Leste iha populasaun ho idade joven barak, tanba ne’e hanesan poténsia ba Governu atu investe hodi populasaun hirak ne’e bele iha kbiit atu hasoru kondisaun iha futuru.

“Sekuandu la investe kedan bainhira tinan sei ki’ik atu hetan nutrisaun di’ak, dezde iha inan nia isin hetan vasina hodi hasees moras, hetan eskola tuir tempu mak populasaun sei la produtivu, la inotivu no la konsege organiza nia aan no pior liután bele estraga fali iha sosiedade,” nia fó hanoin.

Hodi hatutan: “Sekuandu ita koa’lia kona-ba sosiedade ne’ebé justu no prósperu, nia konkretu mak oinsá ita eradika pobreza, reduz dezigualdade no investe ba rekursu umanu atu sai ema produtivu iha futuru”.

Ministra ein ezersísiu ne’e dehan, Jornada Orsamentál hakarak hetan objetivu prinsipál rua hanesan define prioridade nasionál ba tinan 2020 no atu determina tetu fiskál ba 2020.

“Importante tebes atu determina perioridade nasionál sira iha enkuadramentu médiu prazu ne’ebé aliña pedidu governasaun atu nune’e ita bele define tetu  orsamentál ba kada tinan husi 2020 to’o 2023 ho forma ne’ebé realístiku efikáz hodi bele asegura ekonomia rai laran no antisipa inserteza ne’ebé kauza husi ekonomia global”.

Governante ne’e friza tan, Orsamentu Jerál Estadu (OJE) hanesan instrumentu prinsipál hodi promove ekonomia, ne’e duni presiza iha orsamentu ne’ebé responde ba situasaun krítika balun ne’ebé Governu tenke tau atensaun iha tempu hirak nia laran.

Iha biban ne’e nia husu ba instituisaun estadu sira hotu hodi konsidera liña orientasaun husi Primeiru-Ministru, Taur Matan Ruak, ne’ebé rezulta husi retiru ne’ebé VIII Governu halo ona antes ne’e, hodi nune’e bele orienta hotu-hotu nia hanoin kona-ba prioridade ne’ebé presiza konsidera iha elaborasaun orsamentu ba tinan 2020 to’o 2023.

Entretantu, Jornada Orsamentál ne’e sei kontinua to’o aban hodi hetan konkluzaun no bele define tetu fiskál.

Jornalista: Julia Chatarina

Editór: Rafy Belo

HAKEREK NO HATÁN

Please enter your comment!
Please enter your name here