Primeiru-Ministru, Taur Matan Ruak. Imajen Tatoli/Egas Cristóvão

DILI, 27 juñu 2019 (TATOLI)—Primeiru-Ministru (PM), Taur Matan Ruak, fó hanoin ba instituisaun estadu sira hodi prepara orsamentu ne’ebé bele reajusta ba prioridade.

“Ita halo reajusta uituan ita-nia prioridade—la halai sees hosi Planu Estratéjiku Dezenvolvimentu Nasionál (PEDN), maibé ita tenke halo ajustamentu uituan,” nia tenik bainhira halo abetura ba Jornada Orsamentál iha Salaun Ministériu Finansa, Aitarak-Laran, Dili, kinta ne’e.

“Loos katak tomada desizaun ita nian mai hosi dignóstika apuradu hosi situasaun sósiu-ekonómiku. Ida ne’e mak fó dalan ba ita atu elabora iha planeamentu anuál no plurianuál, nune’e ita ezekuta ita-nia planeamentu ho forma sistemátiku no rigorozu,” nia hatutan.

Xefe Governu dehan la’ós de’it problema empregu mak tenke kria, maibé dalaruma sosiedade sira krítika tanba saida mak Governu la kria empregu barak para timoroan sira tenke sai ba li’ur?

“Ideal ne’e Timor kria maibé realístikamente Timor laiha kapasidade atu kria, nein sira ne’ebé koa’lia aban bainrua mai ukun mós sira sei labele, tanba evolusaun sósiu-ekonómiku ne’e sei neneik (lentu),” nia esplika.

Nune’e mós, tuir Taur, fó apoiu ba sira ne’ebé kbiit laek sira, maibé tenke hatene redistribui ka distribui rekursu ne’ebé iha ba sira ne’ebé laiha kondisaun, liliu zona rurál sira.

Ba ida ne’e, PM husu instituisaun estadu sira implementa orsamentu bazeia ba programa atu hetan meta ka objetivu sira no avaliasaun alterasaun mudansa ne’ebé iha para iha tempu badak bele ajusta-án ba evolusaun sira.

“Para bele sistimatiza uituan ita-nia atuasaun no evita arbitraridade, katak ita halo buat ne’ebé hosi ita-nia hanoin, entaun liuhosi livru liña orientasaun bele orienta governu ninia esforsu nune’e bele planeia hahú hosi tinan 2020 to’o 2023,” Taur informa.

Nia akresenta, iha orsamentu 2019 seidauk bele halo tanba governu prepara Orsamentu Jerál Estadu (OJE) rua (2018 no 2019) iha fulan neen nia laran, iha ne’ebé halo serbisu kuaze iha presaun nia laran.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here