Ministru Justisa, Manuel Cárceres da Costa. Imajen Tatoli/António Gonçalves

DILI, 27 juñu 2019 (TATOLI)—Ministru Justisa, Manuel Cárceres da Costa, hateten informasaun kona-ba dadus rai nian Serbisu Nasionál Kadastru (SNC-sigla portugés) labele fó sai tanba ema-nia privasidade.

“Iha asuntu balun ne’ebé públiku presiza hatene no asuntu balun públiku labele hatene. Kuandu ita ko’alia kona-ba dadus, ne’e ema-nia privasidade. Kuandu ema-nia privasidade, ita-nia konstituisaun mós garante hela katak privasidade ema-nian ita labele viola,” dehan Ministru Justisa, iha Palásiu Governu, ohin.

Governante ne’e realsa, SNC ne’e halo serbisu ba ema-nia privasidade, tanba ne’e dadus balun labele públika duni.

“Ita labele ultra demokrátiku demais. Kuandu ita ultra demokrátiku demais ita la sai fali demokrátiku—ita mak estraga fali ita-nia demokrasia,” Cárceres subliña.

Ministru Justisa ne’e respeita tebes opiniaun públiku sira ne’e,  maibé sempre ho prinsípiu ida katak dadus pesoál  nunka bele divulga, tanba ema-nia privasidade.

“Ha’u-nia rain ha’u divulga fali ba públiku, ne’e privasidade ha’u-nian. Sasán uma laran tenke tau ba públiku, ne’e labele,” nia afirma.

Nia husu ba sosiedade sivíl labele jeneraliza sasán, tanba públiku labele hatene ema-nia privasidade.

Iha parte seluk, deputadu bankada KHUNTO, António Verdial, hateten atu solusiona problema ne’e di’ak liu governu bolu sosiedade sivíl ne’ebé halo monitorizasaun ba rai nian esplika didi’ak, nune’e bele intende ba malu.

“Hanesan ema ne’ebé esperiénsia barak iha area rai nian, ha’u atu hatete katak falta koordenasaun, falta kooperasaun no falta kolaborasaun hos organizasaun naun governamentál ho governu. Maski ida-idak hala’o nia funsaun, presiza iha komunikasaun ba malu,” nia dehan iha Parlamentu Nasionál.

Nia haktuir, Serbisu Nasionál Kadastru ne’e hatutan de’it serbisu ne’ebé uluk Diresaun Nasionál Terra no Propriedade kadastrál halo ho apoia mai hosi programa ida bolu naran “Ita-Nia Rai”.

Eis Diretór Nasionál Terra Propriedade Seribisu Kadastál ne’e lee ona peskiza no investigasaun hosi SNC ne’e di’ak tebes.

“Maibé, hanesan preprezentante povu, ha’u hateten katak rejistrasaun hosi aspeitu legál ne’e sei laiha, tanba projetu Ita-Nia Rai uluk ho objetivu ida atu rekolla dadus kona-ba rai no dadus kona-ba objetu iha rai nia leten hanesan pendataan, penguasaan no pemilikan tanah,” nia informa.

António Verdial tenik, objetivu seluk mak atu hatene kazu no problema  no disputa sira mosu entre komunidade ho komunidade no komunidade ho estadu. Tuir nia, importante ba povu mak tenke hetan rai pedasuk ida tuir konstituisaun haruka.

“Ha’u hateten katak lei númeru 13/2017 ne’e rasik seidauk bele implementa tanba presiza tan regra komplementár. Regra komplementár ne’e para aban bainhirua ezekuta lei númeru 13/2017,” nia hateten.

“Kontra ka la kontra ha’u la tau iha kestaun. Ha’u fó esperansa tomak ba governu ho ONG sira presiza halo kooperasaun di’ak, kolaborasaun di’ak, koordenasaun di’ak atu buka solusaun ne’ebé kmanek hodi alkansa problema kona-ba rai nian,” António salienta.

Jornalista: Evaristo Soares Martins

Editór: Xisto Freitas

Lee mós notísia tuir mai: http://www.tatoli.tl/2019/06/relatoriu-peskiza-rede-ba-rai-snc-tenke-hapara-serbisu/

http://www.tatoli.tl/2019/02/parsela-271-mill-mak-rejista-ona-hosi-snc-durante-tinan-6/

HAKEREK NO HATÁN

Please enter your comment!
Please enter your name here