Portavóz Juventude CNRT Osorio Leque, halo deklrasaun iha Konferensia Impresa iha Sede Nasionál CNRT, Bairru Grillos, Dili, Kinta (27/06/2019). Imajen/Egas Cristovão

DILI, 27 juñu 2019 (TATOLI) –Organizasaun Juventude Partidu Kongresu Nasionál Rekonstrusaun Timorense (OJP-CNRT, sigla portugés), konsidera Francisco Kalbuadi Lay, nu’udar membru Parlamentu Nasionál (PN) husi Bankada CNRT hatudu ezemplu di’ak tanba la subar-an iha imunidade nia laran.

Liuhusi konferénsia imprensa ne’ebé hala’o iha Sede partidu CNRT, ohin, iha Bairru Grillos, Dili, portavós OJP-CNRT,  Ozorio Leque, deklara katak, Deputadu Francisco Kalbuadi Lay, atuál Sekretáriu Jerál partidu CNRT  hatudu ezemplu di’ak, tanba nia rasik ho vontade deside hodi ba hatán iha Ministériu Públiku sem halo levantamentu imunidade husi Parlamentu Nasionál.

“Ami fiar katak nia la sala tanba nia nunka envolve iha kualkér tipu krime, ida ne’e ezemplu di’ak mai ita hotu tenke banati tuir,” afirma Ozorio Leque.

Portavós OJP-CNRT ne’e fó sasin katak, Francisco Kalbuadi Lay, to’o oras ne’e la iha akuzasaun ruma husi Ministériu Públiku no mós la submete ba julgamentu iha tribunal.

Foin lalais ne’e, membru Parlamentu Nasionál husi Bankada FRETILIN, José Agustinho  “Somotxo” ho Francisco Miranda Branco, mós hato’o deklarasaun polítika iha PN hodi afirma sira nia preokupasaun kona-ba  nomeasaun Konsellu Ministru nian ba Francisco Kalbuadi Lay, nu’udar Autoridade  Nasionál ba Expo Dubai 2020.

OJP-CNRT hato’o sira nia  agradesimentu ba VIII Governu Konstitusionál ne’ebé nomeia Deputadu Francisco Kalbuadi Lay, nu’udár Autoridade  Nasionál ba Expo Dubai tanba iha kapasidade no experiénsia lidera Expo Milaun-Italia iha 2015 ho di’ak no susesu.

 Jornalista     : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here