Advogado Nasionál, José Teixeira (Loos) no Diretór Ezekutivu SERVE,I.P, Florêncio Sanches (Klaran), Moderadór Maria Martins da Silva iha Talkshow hodi koalia Kona-ba Reforma Sira Ne’ebe Kontribui ba Dezenvolvimentu Ekonomia Liu-Liu Hodi Hadiak Ambiente Negósiu”. Programa Organiza Husi MRLAP. Iha CCD Caicoli,Dili,Kuarta (26/06/2019).. Imajen/Egas Cristovão

DILI, 27 juñu 2019 (TATOLI)-Diretór Ezekutivu SERVE (Servisu Rejistu no Verifikasaun Emprezariál), Florêncio Sanches rekoñese katak governu durante ne’e halo esforsu hodi halo reforma liliu reforma lejislativa no reforma ekonomia.

Iha reforma ekonomia nian mak primeiru númeru empreza aumenta, iha ne’ebé númeru feto emprezariál hamutuk 35% no 40% husi nuymeru emprezariál ne’ebé ki’ik husi totál ne’ebé iha.

“Rezultadu seluk ne’ebé di’ak husi reforma ne’e maka iha tinan kotuk 2016 governu konsege selu saláriu ba makina estadu ho osan emprezáriu sira selu fila mai estadu, ida fali tán maka menus kustu osan, kustu la’ós orsamentál de’it maibé mós tempu, katak uluk ema presiza fulan ne’en atu rejista kompania maibé agora tuir lei 24 oras to’o loron lima,” hateten Diretór SERVE ne’e, iha programa talkshow ne’ebé maka realiza husi MRLAP  (Ministeriu Reforma Lejislativa no Asuntu Parlamentár, iha Sentru Konvensaun Dili, (CCD-sigla portugés), kuarta(26/06).

Diretór SERVE konsidera reforma ne’ebé maka governu halo liuhusi politíka reforma nian iha área ekonomia kapas tebes nune’e iha tinan 2014-2015 Timor-Leste primeiravez hetan mós ranking ida di’ak.

“Ba oin se ita hakarak rezultadu di’ak liután, ho politíka ida ne’ebé hateten katak ita presiza hasa’e reseita husi agora to’o quatro centos milhões kada tinan tolu, nusa labele. Makina estadu bele selu ona ho taxa ne’ebé emprezáriu sira selu, no ida ne’e mós kontribui de’it 40%, imajina 60% signifika osan sira ne’ebé setór privadu selu mai estadu bele kontribui ba konstrui ponte ka eskola ida,” tenik diretór ne’e.

Iha biban ne’e, diretór ne’e mós hateten, iha dezafiu lubuk ida ne’ebé maka enfrenta atu hala’o servisu, nune’e dezafiu tolu ne’ebé sai prioridade liu ne’e maka infraestutura, rekursu umanu no artigu balun ne’ebé konsege hatama ona balun ba vigór maibé ladun apár ho situasaun oinsá atu dezenvolve setór privadu sira ho di’ak liután.

Tanba ne’e, Diretór SERVE realsa katak liuhusi servisu MRLAP nian no instituisaun seluk atu reforma lisensiamentu ba atividade ekonómika nian no liliu  ba atividade rejistu komersiál nian presiza atu reforma liután atu nune’e bele iha liutan konsiderasaun ba setór privadu nia servisu.

Enkuantu, Advogadu José da Silva Teixeira, iha fatin hanesan hateten, aspetu kona-ba polítika reforma lejislativa no judisiáriu nian importante maka simplifikasaun.

“Lei ne’e tenke simplifika la’ós de’it nia prosesu maibé mós nia mekanizmu atendimentu. Atu nune’e setór privadu nasionál bele komprende prosesu hotu, prosesu rejistu negósiu, prosesu hetan lisensa, prosesu atu selu impostu, prosesu burokrasia. Ne’e hotu tenke simplifikadu no presiza ita servisu oituan tan ho ita-nia reforma lejislativa kona ba lei”.

Advogadu ne’e relembra, lei kompania, iha 2004 implementa iha Ministeriu Justisa lori besik fulan tolu ka fulan neen atu rejista de’it kompania ida. Maibé, reforma ne’ebé halo iha 2014 no 2015 ho lei SERVE nian konsege hadi’a situasaun ida ne’e to’o agora; iha semana ida nia laran bele hetan lisensa.

Advogadu timoroan ne’e mós konsidera importante seluk tan maka hadi’a atendimente ba kliente iha setór privadu, tanba ba setór privadu oras hira maka atu gasta halo tan sansaun ho administrasaun públika ho ministériu ka departamentu ruma ne’e osan ne’ebé nia lakon iha nia produtividade. “Tanba ne’e se ita hakarak ekonomia atu la’o ita tenke sientifika buat sira ne’e”.

Tuir advogadu ne’e rasik reforma iha área espesígika presiza prioridade rua; ida maka identifikadu iha relatóriu Banku Mundiál doing business signifika halo negósiu tinan-tinan nian no ida seluk bolu enforcement of contracts atu bele defende no atu halo komprimentu kontratu entre setór privadu, tanba iha área komersiál sei iha problema balun ho falta koñesimentu husi ema kona- ba lei.

“Ohin ha’u ko’alia katak emprezáriu ka ema balun atu loke bisnis (negosiu) ba buka osan iha banku, atu uza rai ho uma atu garantia, labele. Maibé, ita-nia lei réjime titulares ba rai ne’e la’o hela, presiza agora maka atu implementa lei rai ida ne’ebé to’o iha sistema kadastrál, ne’ebé iha loron ruma bainhira ita iha rai pedasuk ida ita iha sertifikadu ba rai ne’e, ita bele lori ba banku empresta osan ho garantia ba rai refere. Ne’e maka reforma ne’e tenke inklui, la’ós de’it halo buat foun ka hadi’a maibé tenke halo mós kontinuasaun ba ida ne’e,” hateten Advogadu José Teixeira.

Iha talkshow ne’e, Advogadu José Teixeira rekomenda mós atu kontinua hadi’a no implementa lei sira ne’ebé maka durante ne’e kria ona, reforsa iha prosesu implementasaun nian.

“Iha estudu barak ne’ebé iha, ho péritus barak ne’ebé mai husi rai li’ur halo ona servisu ida ne’e, atu nune’e bele konsidera mós husi estudu ne’ebé iha, rona nafatin setór privadu sira no parte embaixada sira ne’ebé tulun prosesu implementasaun, hamenus burokrasia, halo setór privadu bele sai kompetetivu liu, aleinde ne’e administra no hafasil liután emprezáriu sira-nia servisu hodi hadi’a ambiente negósiu iha ita-nia rai Timor-Leste,” konklui advogadu timoroan ne’e.

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here