Primeiru-Ministru, Taur Matan Ruak Akompaña Husi Prezidente Parlamentu Nasionál (PN), Arão Noé de Jesus da Costa Amaral no Membru Governu Partisipa iha Jornada Orsamentál ba OJE 2020 Ho Tema “Promove Kualidade Planeamentu no Orsamentu Hodi Hametin Prestasaun Servisu”. Iha Salaun Auditoriu Ministériu Finansas,Aitarak Laran,Dili,Kinta (27/06/2019). Imajen/Egas Cristovão

DILI, 27 juñu 2019 – Iha liña orientasaun ba elaborasaun Proposta Orsamentu 2020 – 2023, Primeiru-Ministru (PM), Taur Matan Ruak  informa, sei promove desentralizasaun iha aprovasaun ba projetu foun sira, hodi implementa delegasaun responsabilidade foun ida tuir formula tolu.

“Infraestrutura problema ne’ebé mak ita iha, iha Fundu infraestrutura ha’u halo mudansa bazeia ba buat tolu: projetu 300.000 ba kraik aprovasaun nível komunitáriu, millaun $5 ba karaik, aprovasaun projetu nível munisipál no ministériu sira no millaun $5 ba leten mak ba fundu infraestrutura”, teni Xefe Governu iha Jornada Orsamentál ho tema “Promove Kualidade Planeamentu no Orsamentu Hodi Hametin Prestasaun Servisu”, ne’ebé realiza iha Salaun Ministériu Finansa, kinta ne’e

Tuir PM, desentralizasaun aprovasaun projetu ne’e Hodi bele dezenvolve setór privadu ki’ik no médiu empreza, “Se lae projetu $150.000 ka $200.000, hotu-hotu mai Fundu Infraestrutura,” hateten xefe ezekutivu hodi kompromete kumpri lei.

Tuir Xefe Ezekutivu ne’e, Governu sei kria kondisaun para ema hotu hetan oportuniadade, maibé hetan ho forma justu no onestu, la’os favoritísmu.

Nia mós enkoraja setór privadu sira tenke sai vizionáriu no akompaña dezenvolvimentu país

Bazeia ba dokumentu liña oriantasaun, Fonte Finansiamentu sira sei mai husi Fundu Petrolíferu, ne’ebé Governu mantéin nia kompromisu hodi garante fundu petrolíferu nia ekilíbriu, atu garante ninia sustentabilidade ba jerasaun sira tuirmai, hodi hamenus presaun tinan ikus-ikus nian kona-ba valór levantamentu ne’ebé liu Rendimentu Sustentavel Estimadu (RSE).

Husi Empréstimu, Governu hasa’e nível endividamentu públiku, ho tetu didi’ak ho ekilíbriu, atu hatán ba nesesidade investimentu nian iha infraestrutura no setór estratéjiku sira husi dezenvolvimentu.

Enkuantu Fonte Finansiamentu husi Dívida Públika, ho hanoin ida sei uza instrumentu emisaun dívida públika, tuir prátika internasionál, sein nunka haluha ezijénsia atu mantein rating kumprimentu Timor-Leste nian, iha nível kualidade ne’ebé aas, liuliu Emisaun Títulu Dívida Públika nian no Partisipasaun husi Sidadaun sira.

Jornalista: Julia Chatarina

Editor      : Rafy Belo

HAKEREK NO HATÁN

Please enter your comment!
Please enter your name here