Diretór Nasionál CNFEP Tibar, Simão Tito Barreto. Imajen Tatoli/Egas Cristóvão

DILI, 26 juñu 2019 (TATOLI)—Sentru Nasionál Empregu no Formasaun (CNEFP-sigla portugés), hahú hosi janeiru 2002 to’o 2019 prodúz ona badaen profisionál na’in rihun-haat atus-neen resin sia (4609).

“Dezde 2002 ita prodúz ona badaen profisionál na’in 4609 iha espesialidade hotu-hotu. Maioria graduadu sira hetan kontratu, maibé balun sai tanba primeiru kontratu ne’e fó saláriu ne’ebé ki’ik liu, entaun balun serbisu fulan ida ka rua tenke sai, tanba saláriu ne’e la tuir sira-nia volume serbisu no balun kontinua dedika-aan iha serbisu,” Diretór CNEFP, Simão Tito Barreto, ba Agência TATOLI, iha edifísiu Ministériu Ensiñu Superiór, Siénsia no Kultura (MESSK), Kolmera, Dili, kuarta (26/6).

Nia esplika, hahú hosi tinan 2002 to’o 2018 sentru refere prodúz graduadu na’in 4585 no iha loron kuarta (27/7/2019) prodúz tan na’in 24.

Simão hatutan, kada tinan graduadu sira hetan kontratu hotu, tanba balun kursu tiha maibé tinan sei ki’ik liu, entaun lakohi serbisu. Nune’e mós, balun ne’ebé graduadu maibé la hetan serbisu, entaun fila-fila ba Tibar hodi kontinua nível seluk iha sentru formasaun refere.

Diretór CNEFP ne’e haktuir, graduadu sira maioria hetan esperiénsia iha área konstrusaun jerál, eletrisidade, kanalizasaun, karpintária, pedreiru no soldadora.

“Iha Tibar iha mós formasaun agrikultura, ospitalidade, marítima ho jestaun ba portu, enérjia solár, ita mós iha formasaun ba instalasaun manutensaun operasaun bomba elétrika no iha elétrika instrumentasaun ba mina no gás,” Simão afirma.

Nia esplika, oras ne’e área hirak ne’e kontinua dezenvolve iha Sentru Formasaun Tibar, nune’e hatudu ba mundu katak Timor-Leste mós iha skill (esperiénsia).

“Jestaun iha Sentru Formasaun Tibar ita la’o ho apoia tomak hosi ita-nia governu ho parseria ajénsia balun, akordu bilaterál no entre ministeriál,”  katak nia.

Diretór ne’e mós tenta hela PMU (Project Management Unit) ho mós China Port ne’ebé sub-kontratadu ba Bolloure iha portu Tibar, nune’e bele involve graduadu sira iha serbisu prosesu konstrusaun ba portu komersiál Tibar.

“Ita loby hela. Sira mós husu ba ita mak área pezadu. Ne’ebé, ita treinu hela para depois kuandu hetan ona kualifikasaun, sira bele oferese vaga ne’e ba ita-na joven sira,” Simão esklarese.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here