Eis Prizioneiru Polítiku, Jacinto Alves

DILI, 26 juñu 2019 (TATOLI)—“Ha’u hanoin buat ida torturasaun ne’e lori nia konsekuénsia boot. Dadur ema arbitráriamente (sewenang-wenang) ho espoen ema ne’e ba violasaun sira hanesan tortura, violasaun seksuál, eskravatura seksuál no mal tratu ne’e dolorozu. Buat sira ne’e, la respeita dignidade ema ida-nian hanesan ema no hanesan sidadun Timor,” dehan Eis Prizioneiru Polítiku, Jacinto Alves.

Se estadu serve duni povu no sidadaun ida ne’e, nia dehan, tenke iha medida konkreta hodi garante katak hahalok aat sira ne’e labele repete no akontese tan. Atu garante ida ne’e, lei tenke hatuur loloos no prosedimentu sira ne’e tenke loos. Pesoál seguransa ka defeza sira bainhira atua manifestante sira tenke iha prosedimentu loos no iha liña komandu ne’ebé loos.

Buat torturasaun ne’e, sé mak bele halo liu, mak ha’u hanoin ita-nia aparelu estadu ninian. Relatóriu Chega! nia rekomendasaun ko’alia kona-ba fortalesimentu institusionál entaun instituisaun sira ne’e tenke iha ninia prosedimentu para prátika sira esesivu hanesan ne’e labele akontese no ita tenke evita,” nia dehan ba Ajénsia TATOLI liuhusi entrevista hafoin semináriu nasionál ba komemorasaun Loron Internasionál Kontra Torturasaun ho tema “Refleta Pasadu hodi Evita Aktu Tortutasaun Ohin & Futuru” ne’ebé hala’o iha salaun konferénsia Centro Nacional Chega! (CNC), Antigu Komarka, Balide, Dili, kuarta (26/6/2019).

Jacinto haklaken, Timor-Leste hatuur prosesu rekonsiliasaun no foti lia-loos hanesan polítika ida nasionál ba konstrusaun estadu, tanba ne’e tenke konsekuen. Hosi relatóriu Chega! no relatóriu Per Memorian Ad Spem, timoroan apriende oinsá rezime ida funsiona no oinsa rezime ida halo violasaun direitu umanu inkluzivamente torturasaun.

Agora dadaun, nia informa, Timor-Leste iha instituisaun públiku Centro Nacional Chega! (CNC) ne’ebé iha kbiit no iha kompeténsia maka’as ba torturasaun. Hein  katak CNC hamutuk ho Provedoria Direitu Uumanu no Justisa (PDHJ-sigla portugés) bele akompaña nafatin instituisaun sira ne’e, buka regulariza prátika violasaun hodi halo lei no kria prosedimentu ne’ebé atu evita ema atu halo violénsia.

“Se kazu violasaun mak sira halo duni, nia konsekuénsia legál tenke iha. Nia sansaun ruma tenke hetan no responsabilidade tenke hatuur iha nia fatin. Ida ne’e mak ha’u hanoin perspetiva ba oin hodi evita para torturasaun ne’e labele akontese tan,” Jacinto haklaken.

Tanbasá torturasaun nafatin mosu iha ámbitu ukun rasik-án, nia hatán, tenke reforsa instituisaun seguransa no defeza ho fortalesimentu instituisaun. Espera katak CNC hamutuk ho PDHJ bele kontribui efetivamente ba hatuur prosedimentu sira ne’e. Sidadaun hotu-hotu tenke hatene katak lei ne’e iha no lei ne’e proteje nia.

“Ha’u hanesan ha’u-nia maluk prizioneiriu sira seluk, altura ne’e ami iha objetivu seluk mak objetivu hetan liberdade no ukun rasik-án. Ha’u hakarak uza liafuan hosi joven ida iha Railaco-Ermera dehan nune’e; ‘Tebe ho sapatu botas militár ninian kamaan liu duké ami-nia klamar oprimidu tanba sistema ida’. Ha’u hanoin prizioneiru sira mós nia hanoin hanesan ne’e,” eis komisáriu CAVR ne’e esplika.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here