Reprezentante Sosiedade Sivíl, Sisto dos Santos

DILI, 26 juñu 2019 (TATOLI)Sosiedade Sivíl koopera ho Instituisaun Públiku Centro Nacional Chega (CNC) realiza semináriu nasionál ba komemorasaun Loron Internasionál Kontra Torturasaun ho tema “Refleta Pasadu hodi Evita Aktu Tortutasaun Ohin & Futuru” ho objetivu atu divulga informasaun no sensibiliza timoroan sira katak torturasaun ne’e inimigu ba demokrasia.

Semináriu refere, primeiru divulga informasaun ba foinsa’e sira ho espresaun sira hosi ema sira ne’ebé diretamente sai vítima torturasaun, nu’udar sasin ba autór ne’ebé sei moris hela. Ida ne’e nu’udar edukasaun ida ne’ebé maka atu transmiti direta liuhusi verbalmente ho interasaun direta ba iha juventude no estudante sira tanba ida ne’e mak biblioteka moris nian.

“Hosi semináriu ida ne’e, ha’u bele dehan katak ita hahú sensibiliza ona katak torturasaun ne’e inimigu ba demokrasia, inimigu ba sosiedade no inimigu ba direitu umanu. Se estadu ida ne’e la tau importánsia ba tortutasaun entaun ita sei labele kuida ita-nia demokrasia no labele komu metin valór no prinsípiu direitu umanu ida ne’ebé uluk komunidade internasionál sira apoiu ita-nia luta ba ukun rasik-án ne’e,” dehan Reprezentante Sosiedade Sivíl, Sisto dos Santos, ba Agência Tatoli liuhusi entrevista iha salaun konferénsia CNC, Antigu Komarka, Balide, Dili, kuarta (26/6/2019).

Internasionalmente, nia hatutan, loron ohin (26 juñu) ne’e nu’udar loron ida ne’ebé mak desidi hosi Asembleia Jerál Organizasaun Nasaun Unida (ONU) iha 1997 katak loron ida ne’e dedika atu apoiu ba vítima torturasaun sira iha mundu tomak.

Agora kontekstu Timor, Sisto esklarese, torturasaun hanesan deskobre ona iha relatóriu Chega! katak ema rihun ba rihun mak sai vítima ba aktu torturasaun ne’e. Agora situasaun ida ukun-án tama ba tinan 20, Timor-Leste restaura nia independénsia maibé vítima sira ne’e sei nafatin iha situasaun ida ne’ebé mak vulnerável no mizarável nia laran.

“Tinan rua ba kotuk, Comité Antí Tortura (CAT) fó feedback ida ba relatóriu ida ne’ebé mak Estadu Timor-Leste haruka ona iha 2016. Komité ne’e insisti ba ita-nia estadu, atu hakonu nia obrigasaun liliu ba estabelesimentu espasu ida ba reparasaun ba vítima tortura sira no  estabelese Komisaun Ema Lakon maibé liu tiha tinan 10, komisaun ne’e seidauk estabelesidu,” nia dehan.

Hanesan sosiedade sivíl, tuir nia, ida ne’e hanesan esforsu ida ne’ebé mak sira halo hodi fó hanoin ba públiku katak maski akontesimentu torturasaun ne’e akontese iha tempu pasadu, maibé nia sirkunstánsia trauma psikolojia ne’e eziste to’o ohin loron. Pior liu-tan, se órgaun soberanu liliu Parlamentu Nasionál seidauk prioritiza ba vítima torturasaun sira ne’e.

Nia hateten, tenke preokupa tanba se laiha korajen atu fó importánsia no prioritiza katak oinsá atu hakotu síklu aktu torturasaun ne’e iha futuru liliu iha prizaun no mós instituisaun sira seluk. Tanba, prátikamente prizioneru sira sei hasoru aktu torturasaun ne’ebé mak hanesan. Se nonook ho situasaun ida ne’e, posívelmente tinan 20 mai, sei reprodúz aktu torturasaun ne’e no dalaruma pior liu-tan situasaun durante okupasaun militár Indonézia.

“Tanba ida ne’e, ita enkoraja para instituisaun estadu hanesan PDHJ no CNC hahú divulga importánsia hosi rekomendasaun Chega! hodi introdúz ba instituisaun sira atu respeita no valoriza vítima sira liuhusi prinsípiu direitu umanu no demokrasia,” tenik ativista ne’e.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here