Sekretáriu Estadu Komunikasaun Sosiál (SEKOMS), Merício Juvinal dos Reis Akara, ho nia delegasaun, Tersa (25/6/2019), iha LIzboa, halo halo sorumutuk ho Ministra Kultura Portugal, Graça de Fonseca. Imajen/Rafy Belo

LIZBOA, 25 juñu 2019 (TATOLI)-Sekretáriu Estadu Komunikasaun Sosiál (SEKOMS), Merício Juvinal dos Reis Akara, akompaña husi Prezidente Rádiu no Televizaun Timor-Leste (RTTL.EP), Francisco da Silva Gari no mós Prezidente TATOLI.IP-Ajénsia informasaun Ofisiál estadu Timor-Leste, José da Costa, inklui Xefe Gabinete SEKOMS, Júlio Gonçalves, halo sorumutuk ho Ministra Kultura Portugal, Graça de Fonseca, hodi ko’alia parseria entre Portugal ho Timor-Leste iha área komunikasaun, inkluzivamente divulgasaun língua portugeza no apoiu  iha rekursu umanu.

“Difuzaun língua portugeza liuhusi meius komunikasaun sosiál importante ba timoroan sira atu bele aprende. Tanba ne’e, nesesita apoiu Portugal ba kestaun ne’e no  rekursu umanu,” hateten Sekretáriu Estadu, Merício Juvinal dos Reis Akara, iha Palácio de Ajuda, Lizboa, tersa (25/6/2019).

Iha fatin hanesan, Ministra Graça de Fonseca, konfirma katak Timor-Leste nu’udar país amigu ba Portugal, tanba ne’e kompromete kontinua apoia iha kualkér área tanba konsidera país rua ne’e relasaun amizade no istórika. “Dispozisaun Portugal (ba Timor-Leste) ne’e totál absoluta”.

Governante portugeza ne’e haktuir ba jornalista TATOLI.IP no RTTL.EP katak, durante enkontru ko’alia mós kona-ba importánsia espasu CPLP (Comunidade dos Países da Língua Portuguesa), liuliu kooperasaun iha área komunikasaun sosiál.

“Liuhusi ita-nia área komunikasaun sosiál, espesífikamente RTP no Lusa, nu’udar meiu ba divulgasaun afirmasaun língua portugeza no presiza iha liután konteúdu. Portantu, iha ne’e, kooperasaun ne’e fundamentál. Iha ne’e halo empeñamentu totál ba Timor-Leste no Portugal.”

Durante iha Portugal, SECOMS alende hasoru malu ho Ministra Graça de Fonseca iha Palásiu Nasionál Ajuda-Lizboa, sorumutuk mós ho Prezidente RTP (Rádiu no Televizaun Portugeza), Gonçalo Reis no Diretór RTP Áfrika, José Arantes, inklui vizita ba instalasaun ekipamentu multimedia no Múzeu RTP nian.

SECOMS ho nia delegasaun halo reuniaun ho Prezidente Eskola Superiór Komunikasaun Sosiál, André Sendi no iha biban hanesan vizita mós instalasaun eskola refere nian.

Tuir ajenda, SECOMS ho delegasaun sei partisipa mós programa g7+ durante loron rua; husi loron 26 to’o 27 juñu no iha loron 28 juñu, sei enkontru ho Diretora CENJOR (Sentru Protokolu Formasaun Profisionál ba Jornalista sira), Deolinda Almeida no mós sei enkontru ho Prezidente Konsellu Administrasaun Lusa, Nicolau Santos no vizita mós instalasaun Lusa nian, inklui entidade portugés sira balun.

 Jornalista       : Rafy Belo

Editór             : Francisco Simões

HAKEREK NO HATÁN

Please enter your comment!
Please enter your name here