Prezidente Parlamentu Nasionál, Arão Noé de Jesus da Costa Amaral. Imajen/António Goncalves

DILI, 26 juñu 2019 (TATOLI)—Prezidente Repúblika (PR), Francisco Guterres Lú-Olo, fó hanoin ba Parlamentu Nasionál (PN) no Governu atu bele konsidera rekomendasaun hosi Komisaun Reforma Lejizlativa ne’ebé harii iha VI Governu Konstitusionál.

Prezidente Parlamentu Nasionál (PPN), Arão Noe dé Jesus da Costa Amaral hateten Xefe Estadu tau atensaun maka’as ba setór judisiáriu.

“Prezidente fó hanoin hodi konsidera relatóriu Komisaun Reforma Judisiál ne’ebé harii iha VI Governu. Ami dehan bazeia ba ida ne’e mak Parlamentu halo inisiativa hodi serbisu hamutuk ho Governu, atu bele konsidera pontu rekomendasaun sira hosi rezultadu ne’ebé mak Komisaun Reforma Lejizlativa atinje iha VI Governu,” nia dehan ba jornalista sira hafoin hasoru malu ho Xefe Estadu, Francisco Guterres Lú Olo, iha Palásiu Prezidente Nicolau Lobato, Bairru Pité, kuarta ne’e.

Komisaun Reforma Lejizlativa ne’ebé harii hosi VI Governu mak atu fó sai rekomendasaun sira ne’ebé importante no prepara relatóriu semestrál  ne’ebé ajuda Governu iha reforma lejizlativa nian no reforma setór justisa nian, hodi bele promove governasaun di’ak ho forma transversál, liuhosi enkuadramentu jurídiku ida ne’ebé koerente.

Prioritiza Lei Organizasaun Judisiária

Iha biban ne’e, PPN hateten PN no Governu iha inisiativa ba Reforma Lejizlativa inklui fó prioridade ba Lei Organizasaun Judisiária tanba durante ne’e Timor-Leste uza hela lei hosi regulamentu UNTAET to’o agora.

“Tuir loos iha Konstituisaun dehan ita iha Tribunál Supremu, maibé regulamentu UNTAET dehan Tribunál Rekursu mak asumi funsaun hanesan Tribunál Supremu. Tanba ne’e, loloos tenke diretamente ba Tribunál Supremu tanba funsaun ne’ebé hala’o durante ne’e hanesan IV órgaun,” Arão esplika.

Nia dehan tan, ho razaun ida ne’e mak parte PN no Governu hanoin presiza duni halo Lei Organizasaun Judisiária hodi bele kria sistema organizasaun judisiáriu rasik.

Tuir nia, bainhira iha Lei Organizasaun Judisiária iha ona sei iha mudansa barak, tanba ne’e mak prepara regulamentu rasik kona-ba Organizasaun Judisiária.

Nune’e mós, nia hatutan, Lei Organizasaun Judisiária fó dalan atu bele alarga tan Tribunál Distritál tanba agora dadauk Tribunál Distritál iha de’it haat hanesan Díli, Oé-Cusse, Suai no Baucau.

 “Se ita laiha lei rasik atu regulariza entaun sei hanesan ne’e nafatin. Tanba ne’e tenke ajusta tuir ita-nia nesesidade. Se ho objetivu atu lori justisa besik ba povu entaun tenke halo mudansa para bele lori justisa ba povu,” nia subliña.

Nia informa, iha 28 juñu tinan ne’e, sei iha reuniaun espesiál ba reforma lejizlativa, atu halo lejizlasaun iha área judisiáriu nian.

Jornalista: Julia Chatarina

Editór: Xisto Freitas

Lee mós notísia tuir mai: http://www.tatoli.tl/2019/06/lei-organizasaun-judisiariu-importante-ba-reforma-lejizlativa/

http://www.tatoli.tl/2019/06/ezbosu-ba-organizasaun-judisiaria-iha-ona-faze-estudu/

HAKEREK NO HATÁN

Please enter your comment!
Please enter your name here