Prezidente Parlamentu Nasionál, Arão Noé de Jesus da Costa Amaral. Imajen António Gonçalves

DILI, 26 juñu 2019 (TATOLI)–Prezidente Parlamentu Nasionál (PPN), Arão Noé de Jesus hasoru malu ho Prezidente Repúblika hodi informa atividade Parlamentu Nasionál (PN) ba fulan ne’e no fulan oin, inklui ajendamentu Ratifikasaun Tratadu Delimitasaun Fronteira Marítima no alterasaun lei tolu, tuir karta ne’ebé meza PN simu ona hosi Governu.

“Informa ba Prezidente Repúblika atividade ne’ebé mak atu prepara ajenda tuir karta hosi Xefe Negosiadór Prinsipál ba Delimitasaun Fronteira Marítima ba PN, katak iha tempu badak sira sei submete Ratifikasaun Tratadu ba Delimitasaun Fronteira Marítima no Alterasaun Lei Tributária, Lei Atividade Petrolífera no Fundu Petrolíferu nian, atu halo alterasaun no ajusta,” nia dehan ba jornalista sira hafoin hasoru malu ho Xefe Estadu, Francisco Guterres Lú Olo, iha Palásiu Prezidente Nicolau Lobato, Bairru Pité, kuarta ne’e.

Nia haktuir, tuir karta hosi Xefe Negosiadór Prinsipál, Kay Rala Xanana Gusmão informa katak Austrália iha ona faze preparasaun hodi fó apresiasaun ba Ratifikasaun Tratadu Delimitasaun Fronteira Marítima.

“Tuir karta ne’e, Austrália mós iha faze preparasaun no iha semana ne’e sira (Parlamentu Australianu) komesa forma ona ekipa harii komisaun eventual ida ba apresiasaun ida ne’e, tanba ne’e mak Parlamentu Timor-Leste mós tenke hahú prosesu ne’e,” nia tenik.

Nune’e, PPN informa, Parlamentu preparadu hodi hein Governu para halo aprezentasaun Ratifikasaun Tratadu no Alterasaun ba Lei Tolu, nune’e Parlamentu bele ajenda no debate.

Nia akresenta, Tuir karta hosi Xefe Negosiadór nian, tarde liu antes 30 agustu 2019, Ratifikasaun Tratadu ne’e tenke tama iha vigór.

“Austrália mós disponível ona. Ha’u hein katak prosesu Timor-Leste nia mós sei la’o tuir para bele rafifikasaun no bele tama iha vigór tuir akordu ne’ebé asina iha Nova Iorke iha loron 5 marsu 2018,” Arão haktuir.

Aleinde ne’e, tuir kalendáriu normál PN, tempu resesu iha loron 15 jullu to’o 15 setembru, tanba ne’e PN tenke prepara kalendáriu.

“Agora atu halo perturbasaun ka extende funsionamentu normál tenke iha razaun ruma. Razaun mak se Governu aprezenta Proposta Lei Alterasaun no Ratifikasaun mak ami sei halo kalendáriu para ajusta fali no justifika kona-ba mudansa ba kalendáriu ba resesu nian,” nia akresenta.

Biban ne’e, PPN mós informa, agora dadauk ekipa PN tuir hela reuniaun G7+ iha Lisboa, hahú 25-27 juñu.

Arão hatutan, PN sei iha atividade komemorasaun tinan 20  referendu hanesan publika livru ida, sei iha fotografia iha resintu Parlamentu ne’ebé fotografia sira sei mai iha tempu rezisténsia to’o agora, nune’e mós sei halo meza redonda iha nível Parlamentu nian ba apresiasaun hafoin tinan 20 referendu.

“Ne’e kona-ba saida mak ita atinje ona durante tinan 20, nune’e bele halo avaliasaun ba ita-nia situasaun no halo previzaun ba oin,” nia dehan tan.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here