Vise Ministra Saúde ba Kuidadu Saúde Primária, Élia A. A. dos Reis Amaral, hala’o abertura ba Semináriu Konsultivu kona-ba Planu Nasional Asaun ba Seguransa Saúde no Ligasaun ba Planu Preparasaun ba Pandemia Influenza iha Timor-Leste, ne'ebé hala'o iha Otél Timor, Dili, Kuarta (26/6/2019). Imajen/Media MS

DILI, 26 Juñu 2019 (TATOLI)–Ministériu Saúde (MS), ohin, hala’o semináriu konsultivu kona-ba Planu Nasionál  Asaun ba Seguransa Saúde no Ligasaun ba Planu Preparasaun ba Pandemia Influenza iha Timor-Leste.

Semináriu  ne’ebé atu haree planu nasionál asaun ba setór saúde no téknikamente atu haree saida mak presiza atu hadi’a seguransa saúde iha rai laran ne’ebé hala’o iha Otél Timor, Dili,  hetan apoia husi Organizasaun Mundiál Saúde (WHO-sigla ingles).

Semináriu ne’ebé sei hala’o durante loron tolu (26-28 juñu 2019) hanesan kontinuasaun Avaliasaun Externa Konjunta ba Implementasaun Regulamentu Sanitáriu Internasionál ne’ebé iha fulan Novembru, tinan kotuk.

 Timor-Leste lidera ho susesu ba avaliasaun refere ho apoiu tékniku no orientasaun husi WHO maka lori rezultadu husi asaun ne’e bele dezenvolve Planu Asaun Nasional ba Seguransa Saúde iha tinan 2019.

“Planu Asaun Nasional ba Seguransa Saúde ita presiza iha siklu mudansa ba iha importasaun hahan ne’ebe bele afeta ba populasaun no ita hotu nia saúde. Tanba ne’e liu husi semináriu ida ne’e hodi haree ba kualidade seguransa saúde ba iha ita nia nasaun,” hateten Vise Ministra Saúde ba Kuidadu Saúde Primária, Élia A. A. dos Reis Amaral.

Join external evaluation iha regulasaun ba sistema internasionál saúde nian, liuliu ba iha Timor-Leste, ita presiza iha seguransa ba atividade importasaun hahán, importasaun ba iha produtu animal no produtu vegetais sira ne’ebé  maka bele transmite moras ba ita nia ema, tanba ne’e, ita presiza halo semináriu ida atu bele hare saida maka bele halo, intermus kualidade seguransa saúde ba iha rai laran nian,”.

Husi semináriu ne’e mós sei haree hotu ba seguransa saúde intersektorál iha rai laran no mós iha rai li’ur, liuliu  iha parte Servisu Alfándega  hodi hare seguransa ba importasaun husi ai-han, ai-moruk, produtu vegetais ho produtu animais.

“Ita presiza iha seguransa ne’ebé mais fortifika para  nune’e  bele tau seguransa ba ita nia konsumidora sira ne’ebé maka atu konsume produtu sira ne’e,” tenik Vise-Ministra Saúde.

Vise-Ministra Saúde husu atu iha apoiu serbisu husi AIFAESA,  Komérsiu, Alfándega, Migrasaun, Servisu Quarantena, Polisia Nasionál Timor-Leste (PNTL), hodi haree oinsá iha seguransa ba iha produtu  importasaun sira ne’ebé tama mai iha rai laran.

“Espera katak liuhusi semináriu ne’e bele rever, valida no konfirma projetu Planu Nasionál Seguransa Saúde liga ba Planu Preparasaun ba Pandemia Influenza iha Timor-Leste tinan 2019 to’o 2023,” hateten Vise-Ministra Saúde. 

Biban ne’e, Medical officer Epidemolojia, Yu Dongboa hateten, bazeia rekomendasaun husi GA join standard tinan kotuk iha lakuna balu ne’ebé maka presiza hadi’a.

WHO nia suporta maka halo komunikasaun ho grupu peritu sira, atu nune’e, bele serbisu hamutuk ho Ministériu Saúde iha parte tékniku nian hodi identifika rekomendasaun ne’ebé maka GA nian atu dezenvolve planu asaun prosesu ida ne’e.

“Lakuna sira ne’ebé presiza hadi’a maka hanesan sistema saúde, emerjénsia saúde no halo vijilánsia, inklui mós laboratóriu. Maibé, prinsipál liu maka haforsa iha parte sistema saúde no mós ba iha laboratóriu nian, oinsá atu bele deteta karik moras ruma mosu. Ida ne’e hanesan komponente ba planu asaun seguransa saúde nian hotu, tanba  laboratóriu saúde la’ós fokus ba ema de’it, maibé ba animal mós,” tenik Yu Dongboa.

Yu Dongboa informa mós katak,  foin lalais mós suporta tan ekipamentu hanesan Termu Kanál atu bele deteta sasán estrañu  sira ne’ebé maka tama mai, hanesan perigu tebes ba parte saúde nian.

Nia hateten, presiza haree mós ba iha atu kria tan sistema Quarantena  ba saúde ema nian, tanba agora sistema Quarantena ba saúde ema nian seidauk iha, tanba ne’e planu ne’e hatama  mós ba planu asaun nasionál ida ne’ebé  presiza diskute atu estabelese.

Iha futuru, Yu Dongboa afirma tan,  sei suporta ba iha rekursu umanu, kapasita ba ema sira servisu iha laboratóriu ho  servisu prinsipál parte tékniku nian, suporta ekipamentu hanesan test kit sira atu deteta virus no baktéria foun ruma.

Jornalista      : Nelia Rosario

Editór            : Francisco Simões

HAKEREK NO HATÁN

Please enter your comment!
Please enter your name here