Ministru Estadu Prezidénsia Konsellu Ministru, Hermenegildo Augusto Cabral Pereira. Imajen Egas Cristóvão

DILI, 26 juñu 2019 (TATOLI)–Reuniaun Konsellu Ministru iha kuarta ne’e, Ministériu Finansa (MF) aprezenta proposta Rezolusaun Governu ba Polítika Asisténsia Externa.

Ministru Estadu Prezidénsia Konsellu Ministru, Hermenegildo Augusto Cabral Pereira informa diploma ne’e atu asegura kualkér asisténsia externa hosi parseiru dezenvolvimentu tuir akordu planu no prioridade Governu.

“Konsellu Ministru ohin konsidera Rezolusaun Governu nian kona-ba polítika jestaun efikásia ajuda externa nian, hanesan asuntu ne’ebé ita sempre debate no diskuti oinsá mak ita bele iha asisténsia externa ne’ebé ho ambiente efikáz, hetan kontrolu no sai na’in rasik, hodi bele iha mós monitorizasaun efikáz ba implementasaun,” nia informa hafoin reuniaun ezekutivu iha Palásiu Governu, ohin.

Polítika Esisténsia Externa hansane baze konstrusaun, manutensaun no fortalesimentu parseiru hosi serbisu efetividade sira no bazeia ba kuadru planeamentu no objetivu ne’ebé Governu elabora ona, hanesan armonizasaun entre asisténsia externa previsível no viável hosi parseiru dezenvolvimentu no prioridade hosi Governu.

Governante ne’e mós dehan tempu badak Timor Leste Development Partner (TLDP) sei realiza reuniaun ho liña ministeriál relevante no bele aprezenta dokumentu balun.

“TLDP hahú loron 2 no 3 jullu sei iha reuniaun bilaterál ba liña ministeriál relevante sira, hafoin loron 4 jullu mak TLDP sei iha reuniaun prinsipál. Tanba ne’e, ohin Ministériu Finansa halo aprezentasaun detalladu hodi Konsellu-Ministru entende no bele implementa hamutuk programa ne’ebé la’ós simples iha loron tolu nia laran,” nia informa tan.

Reuniaun Governu ho TLDP sei organiza hosi Ministériu Negósiu Estranjeiru no Kooperasaun (MNEK) no MF, ho tema “Aprofunda Koordenasaun ba Finansiamentu Dezenvolvimentu” iha salaun MF.

Liuhusi reuniaun TLDP ne’e, iha loron 2 no 3 jullu hala’o sorumutuk bilaterál no iha loron 4 jullu hanesan enkontru multilaterál.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here