Prezidente Tribunál Rekursu, Deolindo dos Santos. Imajen Egas Cristovão

DILI, 25 juñu 2019 (TATOLI)—Prezidente Tribunál Rekursu (PTR), Deolindo dos Santos hateten Estadu bele asegura direitu ba nia sidadaun hodi fó asisténsia legál ba kazu droga involve sidadaun timoroan JSP no AS ne’ebé hetan prende iha Fronteira Mota-Ain, Indonézia.

“Saida mak Estadu atravéz Governu Timor-Leste bele halo mak bele asegura direitu sidadaun rua entaun bele halo kontratu ho advogadu ka defensór ruma ne’ebé mak Estadu sente di’ak atu asegura sira nia direitu,” nia haklaken ba jornalista sira iha Palásiu Prezidente Nicolau Lobato, Bairru Pité, Dili, tersa (25/6).

Maski nune’e, nia dehan, Estadu labele halo buat barak tanba entre Governu Timor-Leste no Repúblika Indonézia rasik seidauk iha kooperasaun konkretu, nune’e tuir nia tenke respeitu prosesu legál iha nasaun seluk.

“Ita tenke respeitu prosesu ne’ebé Indonézia nu’udar nasaun soberanu ida halo ona. Ita mós nu’udar nasaun soberanu ida, entaun kada nasaun ne’e iha nia prosesu legál rasik,” Deolindo tenik.

 “Dalaruma ita halo julgamentu ba sidadaun Indonézia iha ita-nia fatin bazeia ba ita-nia regra prosesuál, nune’e mós hanesan kuandu komete iha sira-nia territóriu, sira mós halo prosesu bazeia ba regra ne’ebé mak iha,” nia salienta.

Iha loron 29 maiu 2019, Autoridade Servisu Alfándega Indonézia prende kazál timoroan iha Fronteira Mota-Ain, Belu, Timor Osidentál, tanba lori droga kilógrama 1,861 iha mákina impresora mutin tipu EPSON A4 nia laran.

Ba kazu ida ne’e, Polísia Nasionál Serbisu Investigasaun Kriminál (PNSIK) iha loron 30 maiu, kaptura ona suspeitu sidadaun Filipina na’in tolu ho inisiál JB nu’udar patraun Kompañia JVK International Movers ho nia espoza M no suspeitu J, ne’ebé deskonfia nu’udar na’in ba aimoruk droga ne’ebé haruka sidadaun timoroan na’in rua, JSP no AS, lori ba Kúpaun.

Tanba ida ne’e, Tribunál Distritál Dili (TDD) iha segunda (03/06/2019) liuhosi primeiru interrogatóriu aplika medida kausaun prizaun preventiva ba arguidu JB no fó Termu Identidade Rezidénsia(TIR) ba arguidu M no J hodi hein prosesu investigasaun kontinuasaun.

Jornalista: Julia Chatarina

Xisto Freitas

HAKEREK NO HATÁN

Please enter your comment!
Please enter your name here